Ministri i Mbrojtjes, Niko Peleshi ka bërë një përditësim të situatës të shkaktuar nga moti i keq dhe reshjet e dendura që kanë përfshirë vendin tonë.
Në një dalje për mediat ministri tha se lumi Vjosa është pranë niveleve kritike të tij për shkak të prurjeve të mëdha, ndërsa shtoi se ka shtim të sipërfaqeve të përmbytura në zonat e Nënshkodrës.
“Priten reshje të dendura shiu në vend. Lumi Vjosa është pranë niveleve kritike. Ka shtim të përmbytjeve në zonat e Nënshkodrës. Shkarkimet po bëhen në mënyrë të kujdesshme nga KESH. Gjatë ditës së djeshme përmendën dhe shkëputjet e energjisë elektrike. Ka pasur disa ndërprerje në zona të Shkodrës, Kukësit, apo dhe në Korçë. Sa i përket kuotave të lumenjve, Osumi është në rënie. Në Urën e Varur, ky lum është në kuota normale. Drini në Shkodër, është në kuotë normale. Niveli i liqenit të Shkodrës është dhe gjysmë metri nga kuota kritike. Buna ka dalë nga shtrati. Në Lezhë kemi pasur disa vërshime në disa rrugë të qytetit.”, tha Peleshi.
