Kapet dhe ndalohet autori i dyshuar i ngjarjes së datës 26.10.2020, ku në lagjen “Sheq i madh” Fier, mbeti i vrarë me armë zjarri shtetasi Ahmet Toska.
Nga Sektori për Hetimin e Krimeve të Rënda në DVP Fier, në bashkëpunim me Prokurorinë e Rrethit Gjyqësor Fier, në lidhje me ngjarjen e ndodhur në datë 26.10.2020, ku në lagjen “Sheq i madh”, Fier është vrarë me armë zjarri shtetasi Ahmet Toska, 50 vjeç, pas një pune të mirëorganizuar dhe hetimeve të pandërprera, është arritur të behet kapja dhe ndalimi i autorit të dyshuar:
F. Hoxhaj, 52 vjeç, banues në Fier.
Prokuroria pranë Gjykatës së Shkallës së Parë Fier në bazë të fakteve dhe provave të administruara në interes të hetimeve të procedimit penal të regjistruar për vrasjen e shtetasit Ahmet Toska, ka lëshuar urdhërin për ndalimin e shtetasit F. H., si autor i dyshuar për kryerjen e veprës penale “Vrasje me paramendim” dhe “Mbajtje pa leje të armëve dhe municionit luftarak”.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale.
Ahmet Toska u vra mëngjesin e 26 tetorit sapo doli nga banesa me bashkëshorten. Një person i maskuar e qëlloi atë me armë dhe më pas u largua në këmbë.
Dyshohet se viktima ishte vëzhguar prej disa ditësh nga autori i vrasjes. Motivet e këtij krimi mbeten të paqarta. Pista e hetimeve është përqëndruar në konflitet e pronësisë, megjithatë nuk përjashtohen as pistat e tjera.
