Kryebashkiaku i Kukësit Safet Gjici ka dhënë dorëheqjen nga detyra, pas publikimit të një videoje intime të tij në zyrën e bashkisë.
Me anë të një statusi në “Facebook”, Gjici ka bërë me dije se ka rënë pre e një kurthi, të “orkestruar” nga kundërshtarët e tij.
Ai shprehet se me vajzën në video kishte marrëdhënie intime dhe se ndihet thellësisht i keqardhur për tradhtinë ndaj njerëzve që i kanë besuar votën.
Gjici ka kërkuar ndjesë për të gjithë mbështetësit duke thënë se nderi i jetës së tij u njollos nga një mendjelehtësi e pafalshme.
REAGIMI I SAFET GJICIT:
“Ndjesë të thellë publike çdokujt që sot ka parë atë material të shëmtuar video. Pas një fushate dhe përballjeje jo të lehtë me kundërshtarët e mi, pas të cilës rezultova fitues, fatkeqësisht unë rash pre e një kurthi të përgatitur me detaje nga e njëjta dorë njerëzish me të cilët u përballa në zgjedhje. Ja arritën ta bëjnë në një formë tjetër të pistë atë që s’e bënë dot me votën e kuksianëve.
Jam shumë i keqardhur për ngjarjen dhe jam mëse i qartë se në këtë situatë nuk ka vlerë asnjë lloj sqarimi. Prej disa kohësh unë kam një marrëdhënie intime me vajzën në fjalë por sigurisht nuk kam asnjë justifikim për atë çka ka ndodhur pavarërisht se i rënë në kurth. Nuk mund të jem më unë njeriu që punon në atë zyrë shteti pasi e kam tradhëtuar besimin e atyre mijëra njerëzve që besuan e punuan me mua për ta bërë Kukësin një qytet gjithnjë e më të mirë. Ndjesë të gjithëve dhe mirënjohje gjithë jeten kujtdo më besoi dhe mbështeti. Ishte nderi i jetës time që u njollos nga një mendjelehtësi e pafalshme ndaj sot ndjej detyrimin minimal të jap dorëheqjen! Zoti ju bekoftë të gjithëve!”
