Makina e bashkëpunëtorit të ngushtë të Danilo Vuçiç, djalit të presidentit serb Aleksandër Vuçiç është gjetur dy javë pas sulmit në Banjskë të Zveçanit.
Ministri i Brendshëm i Kosovës, Xhelal Sveçla deklaron se brenda makinës janë gjetur dhe dokumentet e Milorad Jevtiç.
Sveçla nga pesë vizita që ka bërë djali i Vuçiçit në Kosovë, në katër prej tyre ka qenë i shoqëruar nga Milorad Jevtiç, i cili është identifikuar edhe si një nga sulmuesit e KFOR më 29 maj në Zveçan.
“Dy javë pas sulmit terrorist në Banjska, vijojmë me zbardhjen e fakteve që vërtetojnë lidhjen direkte të Serbisë në organizimin dhe realizimin e këtij sulmi. Në vendin e ngjarjes ku ka ndodhur sulmi, njësitet policore kanë gjetur dokumentin personal dhe veturën e Milorad Jevtic gjë që dëshmon se ai ka qenë në njësitin që kanë sulmuar Policinë e Kosovës. Terroristi Milorad Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq. Nga 5 vizitat e fundit të djalit të Vuciqit në Kosovë, 4 herë ata kanë qenë bashkë në të njejtën veturë. Milorad Jevtiq është identifikuar edhe si njëri ndër sulmuesit e ushtarëve të KFOR-it më 29 maj në Zveçan. Mbetet që organet e sigurisë dhe hetimet të zbulojnë se përveç Vuçiqit dhe strukturave të larta shtetërore serbe, a ka qenë edhe djali i tij në planifikimin dhe organizimin e sulmit terrorist në Banjskë të Zveçanit”, shkruan Sveçla në Facebook.
