Policia e Izraelit tha se 16 persona u arrestuan në Tel Aviv gjatë protestave të mëdha që kërkonin lirimin e pengjeve të mbajtura në Gaza dhe largimin e kryeministrit Benjamin Netanyahu. Demonstruesit u arrestuan “për ndërprerje të trafikut dhe bllokim të rrugëve”, tha policia në një deklaratë të lëshuar të shtunën.
“Kishte një numër të madh protestuesish që prishën rendin publik duke ndezur zjarre, duke rrëzuar barrierat e policisë, duke penguar rrugët dhe duke u përplasur me forcat e rendit: 16 individë u arrestuan dhe 9 gjoba prej 1000 shekelësh (270 dollarë) u shkruan për ndërprerje të trafikut dhe bllokimin e rrugëve”, thuhet në deklaratë.
Video tregon policinë duke përdorur një top uji për të shpërndarë protestuesit në autostradën Ayalon në Tel Aviv dhe duke arrestuar të paktën një person, i cili u fut në një automjet policie. Pamjet tregojnë një numër protestuesish që qëndrojnë para mjetit ujë-hedhës, duke brohoritur: “Ne nuk do të dorëzohemi derisa gjërat të përmirësohen”. Policia e Izraelit inkurajoi protestuesit në Tel Aviv që t’i binden ligjit dhe të shmangin protestat e dhunshme në një deklaratë të veçantë të lëshuar të shtunën dhe të postuar në X.
