Ministri i Drejtësisë, Ulsi Manja ka reaguar rreth vendimit të opozitës për të miratuar Amnistinë Penale.
Manja tha se ky vendim u vonua nga axhenda politike të turbullta që e morën peng këtë akt kushtetues mëshire të shtetit. Ai ka mbështetur përsëri idenë e tij se Aministia Penale do të marrë të gjitha votat e deputetëve.
Ai ka cituar fjalën popullore “i duruari, i fituari”.
Reagimi i Ulsi Manjës:
Përshëndes vendimin e opozitës për të miratuar më në fund Amnistinë Penale, e cila u vonua si asnjëherë tjetër nga axhenda politike të turbullta që e morën peng këtë akt kushtetues mëshire të shtetit, duke dëmtuar afro 700 përfituesit e kësaj aministie.
Me kënaqësi të veçantë konstatova se opozita mbështeti variantin e amnistisë së propozuar nga Ministria e Drejtësisë dhe Qeveria Shqiptare, ku as nuk bëhej fjalë për amnistimin e subjekteve të SPAK-ut e të Gjykatës Speciale.
Së fundmi nuk e fsheh dot kënaqësinë që siç e pata deklaruar publikisht për mediat përpara Kuvendit – kur turbullia e një pjese të parlamentit e bënte aministinë të dukej e pashpresë – Aministia Penale do të marrë të gjitha votat e deputetëve!
Nuk thotë kot populli, i duruari i fituari dhe le të shërbejë ky zhvillim pozitiv edhe për ata që s’kanë pse ikin më nga tavolina e punës, për të marrë rrugë të shkurtra që s’çojnë askund dhe si përfundim për t’i dalë gjatë rikthimit në tavolinë.
