Në Shëngjin ka nisur protesta e paralajmëruar në mbrojtje të çështjes së emigrantëve. Mesditën e sotme në këtë qytezë janë bërë bashkë aktivistë italianë dhe shqiptarë, të cilët me parulla dhe pankarta të ndryshme kërkojnë të sensibilizojnë oponionin në lidhje me procedurat e qeverisë italiane për shqyrtimin e kërkesave për azil të emigrantëve që vijnë kryesisht nga vendet e Afrikës. Pjesëmarrësit janë shprehur gjatë kësaj proteste se strehimi i emigrantëve në kampin e Gjadrit shkel të drejtat dhe liritë e njeriut. Siç dihet, disa javë më parë shteti fqinj nisi procedurat e shqyrtimit të azilit për emigrantët që kanë mbërritur në mënyrë klandestine në Itali, por gjykata e Romës ka pezulluar deri tani një gjë të tillë, duke kërkuar kthimin mbrapsht të emigrantëve që u sollën në kampin e Gjadrit.