Pengjet e mbajtura në Gaza do të lirohen herët të hënën në mëngjes, tha një zëdhënëse e zyrës së kryeministrit izraelit, duke “korrigjuar” një deklaratë të zëvendëspresidentit të SHBA-së J.D. Vance, i cili tha se lirimi i tyre pritet të ndodhë nga momenti në moment.
Shosh Bedrosian shtoi se pengjet do të lirohen të gjithë në të njëjtën kohë dhe do të transferohen në Kryqin e Kuq përpara se të kthehen në Izrael.
Ajo shtoi se Hamasi nuk do të organizojë asnjë ceremoni propagande pas lirimit të pengjeve, siç bëri në shkëmbimet e mëparshme, sipas CNNi.
Këtë herë, 20 pengjet e gjalla që mbahen në Gaza do të “lirohen njëkohësisht dhe do të transportohen me gjashtë deri në tetë automjete në Kryqin e Kuq pa ndonjë shfaqje nga Hamasi, organizata terroriste”, shtoi Bedrosian.
Kujtojmë se ka ende 20 pengje të gjalla në Gaza, ndërsa rreth 250 palestinezë të dënuar dhe 1,700 të mbajtur që nga sulmet e 7 tetorit do të lirohen nga burgjet izraelite.
Lirimi i tyre, siç tha zëdhënësja e Netanyahut, do të bëhet sapo pengjet të kalojnë kufirin me Izraelin.
“Të burgosurit palestinezë do të lirohen sapo Izraeli të marrë konfirmimin se të gjithë pengjet tona do të kalojnë kufirin për në Izrael”, tha Shosh Bedrosian.
“Dhe sapo të marrim këtë konfirmim, të burgosurit do të jenë tashmë në autobusë që do të nisen menjëherë”, shtoi ai.
Më parë, zëvendëspresidenti amerikan JD Vance, në një intervistë me NBC Neës, kishte theksuar se lirimi i pengjeve pritej në çdo moment:
“Në çdo kohë, pengjet nga Gaza mund të lirohen”, tha ai, duke shtuar se “Shtetet e Bashkuara nuk kanë ndërmend të vendosin forca ushtarake në Rripin e Gazës ose në Izrael”.
Netanyahu: Izraeli është gati të mirëpresë pengjet “menjëherë”
Nga ana e tij, kryeministri izraelit Benjamin Netanyahu deklaroi se “Izraeli është i përgatitur dhe gati të pranojë menjëherë të gjithë pengjet”.
Sipas gazetës amerikane “Wall Street Journal”, ushtria izraelite po përgatitet të marrë pengjet që sot, mbrëmjen e së dielës, megjithëse ende vlerëson se dorëzimi ka më shumë gjasa të ndodhë të hënën, kur Presidenti i SHBA-së Donald Trump do të vizitojë Izraelin dhe Egjiptin.
Hamasi gjithashtu i informoi ndërmjetësuesit dhe Izraelin se nuk e di vendndodhjen e disa pengjeve të vdekura dhe se do të ketë vështirësi në përmbushjen e afatit 72-orësh të përcaktuar nga plani i Trump për dorëzimin e tyre.
Shërbimet e inteligjencës izraelite gjithashtu duket se e pranojnë këtë situatë, duke pranuar se do të duhet më shumë kohë për të mbledhur trupat.
Sipas të njëjtave burime, po krijohet një grup pune shumëkombësh – me pjesëmarrjen e Turqisë, SHBA-së, Katarit dhe Egjiptit – për të gjetur trupat e pengjeve izraelite, vendndodhja e të cilëve nuk dihet.
