Shefi i NATO-s, Mark Rutte, ka deklaruar se presidenti amerikan Donald Trump “po bën gjërat e duhura për Aleancën”, duke i shtyrë vendet anëtare të rrisin shpenzimet për mbrojtjen.
Deklarata u bë gjatë një vizite në Kroaci, ku Rutte u takua me kryeministrin Andrej Plenkoviç. I pyetur për komentet e Trump lidhur me Groenlandën, ai nuk iu përgjigj drejtpërdrejt, por theksoi se mirëpret diskutimet e aleatëve për një bashkëpunim më të madh në Arktik.
“Britanikët dhe gjermanët kanë bërë disa njoftime sot. Ne po punojmë së bashku për të parë si mund të bashkohemi më fort si aleancë, përfshirë shtatë vendet tona anëtare që kufizohen me veriun e largët dhe Arktikun, për të ndërtuar hapin e radhës, i cili është thelbësor”, u shpreh Rutte.
Ai shtoi se Danimarka po përshpejton investimet në mbrojtje, përfshirë kapacitete të veçanta për mbrojtjen e territoreve si Groenlanda.
“Po punojmë realisht së bashku. Shqetësimi im kryesor është se si të qëndrojmë të sigurt ndaj Rusisë dhe çdo kundërshtari tjetër. Shikoni çfarë po bën Kina, duke ndërtuar me shpejtësi forcat e saj të armatosura, por edhe Koreja e Veriut dhe të tjerë që mund të na kenë qëllime të këqija. Ky është roli im dhe besoj se do t’ia dalim”, përfundoi shefi i NATO-s.
