Duka i Sussex-it, Princi Harry, ka mbërritur në një gjykatë qendrore në Londër, ku ai dhe gjashtë figura të tjera të njohura kanë nisur një betejë ligjore kundër botuesit të gazetës “Daily Mail”, duke e akuzuar për përdorim të paligjshëm të metodave të mbledhjes së informacionit për sigurimin e artikujve.
Princi Harry u paraqit në Gjykatën e Lartë për të ndjekur seancën hapëse të çështjes, e cila pritet të zgjasë rreth 10 javë. Ai pritet të dëshmojë më vonë gjatë kësaj jave dhe ka udhëtuar nga Kalifornia të dielën.
Duka është pjesë e një grupi paditësish me profil të lartë, ku përfshihet edhe Doreen Lawrence, nëna e Stephen Lawrence, i cili u vra në një sulm racist më shumë se 30 vjet më parë. Në këtë padi marrin pjesë gjithashtu këngëtari Sir Elton John dhe bashkëshorti i tij David Furnish, aktoret Elizabeth Hurley dhe Sadie Frost, si dhe ish-deputeti liberal-demokrat Simon Hughes. Hurley dhe Frost ishin të pranishme në sallën e gjyqit, ashtu si edhe Princi Harry.
Paditësit akuzojnë kompaninë Associated Newspapers, botuese e “Daily Mail” dhe “Mail on Sunday”, se ka punësuar hetues privatë për të vendosur pajisje përgjimi në makina, për të siguruar të dhëna private përmes mashtrimit (“blagging”) dhe për të përgjuar biseda telefonike private. Associated Newspapers i mohon të gjitha akuzat, duke i cilësuar ato si “shpifje sensacionaliste dhe absurde”.
Kjo padi përbën kulmin e disa proceseve ligjore të nisura nga Princi Harry kundër grupeve mediatike, të cilat ai i akuzon për veprimtari të paligjshme. Padia ndaj Associated Newspapers Ltd u depozitua në tetor të vitit 2022. Kompania dështoi në përpjekjen për ta hedhur poshtë çështjen, pasi argumentoi se pretendimet ishin të vjetruara.
Pavarësisht përfundimit, pritet që procesi të jetë jashtëzakonisht i kushtueshëm, me shpenzime që mund të arrijnë deri në 38 milionë paund. Pretendimet e Princit Harry lidhen me një sërë artikujsh që dyshohet se janë prodhuar përmes metodave të paligjshme. Avokati David Sherborne, që përfaqëson paditësit, ka deklaruar se veprimet e paligjshme përfshijnë përgjimin e mesazheve zanore, dëgjimin e bisedave telefonike fikse dhe sigurimin e të dhënave mjekësore. Në parashtresat me shkrim, ai thekson se këto veprime shtrihen nga viti 1993 deri në vitin 2011, madje në disa raste edhe deri në vitin 2018.
Gjyqi nis zyrtarisht të hënën me paraqitjen e argumenteve hapëse nga pala paditëse.
Më herët, Princi Harry ka ngritur padi edhe kundër botuesve të gazetave Mirror dhe Sun për përdorim të paligjshëm të mbledhjes së informacionit. Në vitin 2023, ai fitoi 140,600 paund dëmshpërblim nga Mirror Group Newspapers. Vitin e kaluar, ai arriti një marrëveshje jashtëgjyqësore me News Group Newspapers (NGN), botues i Sun dhe gazetës tashmë të mbyllur News of the World.
