Në një kohë kur raportet mes Shteteve të Bashkuara dhe Bashkimit Evropian po përballen me disa sfida dhe tensione, sidomos lidhur me Groenlandën, Shqipëria pozicionohet si një urë e balancuar mes të dyve. Ministri i Mbrojtjes, Pirro Vengu, deklaroi sot, më 26 janar 2026, se vendi ynë nuk është në anën e njërit apo tjetrit, por qëndron mes Washingtonit dhe Brukselit, duke ndjekur një politikë të jashtme dhe mbrojtjeje të ekuilibruar dhe të qëndrueshme.
“Ne nuk jemi mes Washingtonit dhe Brukselit, por në mes të të dyjave. Shqipëria e sheh rolin e saj si konstruktiv dhe partner të besueshëm, duke kontribuar për paqen dhe sigurinë në rajon”, tha Vengu, duke iu referuar tensioneve të fundit dhe debatit mbi pozicionin e Ballkanit Perëndimor në skenën ndërkombëtare.
PShqipëria ka arritur një marrëveshje trilaterale me Kosovën dhe Kroacinë për bashkëpunim ushtarak dhe stërvitor. Marrëveshja, sipas ministrit Vengu, nuk ka për qëllim kundërshtimin e ndonjë vendi dhe, në veçanti, nuk është kundër Serbisë. “Kjo marrëveshje nuk është kundër askujt. Synimi ynë është të forcojmë kapacitetet tona, të rrisim bashkëpunimin rajonal dhe të krijojmë një strukturë të qëndrueshme bashkëpunimi mes vendeve mike”, u shpreh ministri.
Sipas Vengut, marrëveshja do të lehtësojë stërvitjen e përbashkët, shkëmbimin e eksperiencës dhe koordinimin mes forcave të armatosura, duke rritur gatishmërinë për situata emergjente, kriza humanitare dhe fatkeqësi natyrore. Ministri theksoi se Shqipëria mirëpret edhe vende të tjera që të bashkohen në këtë nismë, duke e bërë atë një platformë rajonale gjithëpërfshirëse.
Ministri rikujtoi edhe marrëveshjet e tjera strategjike të vendit. Marrëveshja me Turqinë për Pashalimanin, e cila është në fuqi që nga viti 1992, mbetet e vlefshme dhe nuk përbën kundërshtim për bashkëpunimet e tjera ndërkombëtare. Po ashtu, projekti me kompaninë italiane Fincantieri për prodhimin e anijeve të reja ushtarake është një investim i pavarur, i cili shkon paralelisht me marrëveshjet e reja dhe kontribuon në modernizimin e flotës detare.
Ministri Vengu nënvizoi se modernizimi i Forcave të Armatosura dhe strukturave të emergjencave civile është një prioritet strategjik për vendin. Ai bëri me dije se pagat e ushtarakëve do të rriten gradualisht, me synimin që deri në vitin 2029 të arrijnë mesataren e pagave të NATO-s. Përveç rritjes së pagave, Shqipëria po investon në trajnime dhe arsimin ushtarak, duke zhvilluar fazën e dytë të kampusit të Akademisë së Forcave të Armatosura në Tufinë, me programe master dhe doktorature në çështje ushtarake.
Aktualisht, Forcat e Armatosura shqiptare janë të angazhuara në 11 misione ndërkombëtare, me mbi 700 trupa jashtë vendit. Në fushën e emergjencave civile, ministri vuri theksin te gatishmëria dhe modernizimi i pajisjeve: Spitali i Traumës dhe repartet ushtarake do të pajisen me teknologji të reja, ndërsa Forcat Detare po marrin anije të reja, dhe Forca Tokësore është tashmë e pajisur me armatime moderne, përfshirë raketat Javelin.
Vengu përfundoi duke theksuar se strategjia e mbrojtjes shqiptare është e orientuar jo vetëm drejt forcimit të kapaciteteve ushtarake, por edhe drejt krijimit të një sistemi të qëndrueshëm emergjencash civile, gati për çdo krizë, duke përfshirë fatkeqësitë natyrore dhe situatat humanitare.
