Një shpërthim ka goditur një xhami në pjesën juglindore të Islamabadit , duke shkaktuar alarm midis forcave të sigurisë pakistaneze. Sipas informacioneve fillestare, shpërthimi ndodhi në xhaminë Hadizatul Kubra në zonën Tarlai , gjatë lutjeve të së premtes.

Al Jazeera raporton të paktën 15 të vdekur dhe 80 të plagosur. “Kemi çuar disa persona në spitale. Nuk mund të them në këtë kohë se sa janë të vdekur, por po, ka viktima”, tha oficeri i policisë lokale Zafar Iqbal. Ekipet e shpëtimit dhe forcat e sigurisë nxituan në vendngjarje, duke rrethuar zonën dhe duke ofruar ndihmë.

Shpërthimi solli në mendje sulmin e përgjakshëm në nëntor të vitit të kaluar, kur një sulmues vetëvrasës hodhi veten në erë në hyrje të Kompleksit të Gjykatës së Qarkut në Islamabad, duke vrarë të paktën 12 persona dhe duke plagosur dhjetëra të tjerë.