Në sajë të bashkëpunimit me projektin për Sigurinë Ushqimore të financuar nga BE-ja, AKU-ja ka vijuar shpërndarjen e materialeve mbrojtëse si mbështetje dhe bashkëpunim me subjektet ushqimore për t’i ardhur sadopak në ndihmë në zbatimin e masave të marra nga qeveria shqiptare.
Drejtori i Përgjithshëm i AKU-së, Robert Lili, ka qenë i pranishëm në shumë subjekte ushqimore në Durrës, duke monitoruar nga afër zbatimin e masave të marra kundër përhapjes së COVID-19. Në mënyrë simbolike, stafi i AKU-së dhuroi disa materiale mbrojtëse në subjektet private.
Drejtori Lili theksoi se respektimi i të gjitha masave të vendosura dhe forcimi i mëtejshëm i tyre është detyrë e çdo subjekti ushqimor, ndaj kërkoi forcimin e bashkëpunimit për të shmangur ndëshkimet ndaj çdo shkeljeje të mundshme.
“Jeta dhe shëndeti i konsumatorëve është prioriteti kryesor i institucionit tonë, askush që cënon interesin e përbashkët nuk do të tolerohet, ndaj të bëjmë më të mirën e mundshme për ta mbrojtur atë”,- deklaroi kreu i përgjithshëm i AKU, Robert Lili.
