Zëvendëspresidenti i Shteteve të Bashkuara të Amerikës, J.D. Vance, deklaroi në podkastin Benny Show se Uashingtoni do të vazhdojë operacionet në Iran “për pak kohë më gjatë”, me qëllim që të neutralizojë Republikën Islamike për një periudhë “shumë, shumë të gjatë”.
Vance pranoi se fitimet e arritura deri tani nga SHBA-të nuk do të jenë të përhershme, duke theksuar kërcënimet që vijnë nga programi bërthamor iranian. “Ky vend na kërcënon në të gjitha këto mënyra. Ata ende po përpiqen të ndërtojnë armë bërthamore. Ne duhet t’i neutralizojmë ata për një kohë shumë, shumë të gjatë,” tha ai.
Duke u ndalur te ndikimi i konfliktit në tregun global, Vance foli për rritjen e çmimeve të gazit, duke e konsideruar këtë efekt “shumë të përkohshëm” dhe një pasojë të konfliktit që, sipas tij, do të zgjasë vetëm për një periudhë të shkurtër. “Nuk jemi të interesuar të qëndrojmë në Iran pas një ose dy vitesh. Po bëjmë biznes. Do të dalim së shpejti dhe çmimet e gazit do të ulen përsëri,” shtoi ai. Deklaratat e Vance janë ndër pranimet më të qarta të administratës amerikane për qëllimet afatgjata në Iran dhe implikimet e tyre për stabilitetin rajonal dhe ekonominë globale.
