Vendet e shenjta në Jerusalem do të rihapen për vizitorët dhe besimtarët të enjten në mëngjes. Kështu ka njoftuar policia izraelite.
“Qindra oficerë policie, forca të Policisë Kufitare dhe vullnetarë do të vendosen në të gjithë qytetin, përgjatë rrugëve kryesore, në Qytetin e Vjetër dhe në vendet e shenjta, me qëllim që të mundësohet akses i sigurt për të gjithë besimtarët dhe vizitorët, duke ruajtur një mjedis të sigurt për lirinë e adhurimit, duke ruajtur rendin publik dhe duke siguruar sigurinë publike”, thuhet në deklaratë.
Autoritetet presin që të ketë trafik të dendur dhe i kanë kërkuar publikut të tregojë durim, të dëgjojë udhëzimet e policisë dhe të raportojë çdo shqetësim.
Njoftimi u bë menjëherë pasi Izraeli tha se po lehtësonte kufizimet e kohës së luftës, duke hapur rrugën për rihapjen e shkollave dhe vendeve të punës.
Autoritetet izraelite kishin kufizuar qasjen në vendet fetare në Jerusalemin Lindor gjatë luftës me Iranin, duke përfshirë Xhaminë Al-Aksa, Murin Perëndimor dhe Kishën e Varrit të Shenjtë.
Muajin e kaluar, pati reagime kur dy udhëheqës të lartë të Kishës Katolike në Jerusalem u bllokuan fillimisht të hynin në Kishën e Varrit të Shenjtë për të shënuar fillimin e Javës së Shenjtë të Dielën e Palmave.
Kryeministri izraelit, Benjamin Netanyahu e anuloi shpejt masën paraprake të sigurisë dhe u dha atyre akses. Më pas u arrit marrëveshje midis udhëheqësve të kishës dhe zyrtarëve për pjesën tjetër të javës së Pashkëve.
