Mbështetja për Donald Trump ka rënë nën pragun e 40% dhe ka arritur në pikën më të ulët të mandatit të tij të dytë, duke u rikthyer në nivelet e regjistruara pas sulmit ndaj Kongresit më 6 janar 2021, një nga momentet më të errëta të demokracisë amerikane.

Sipas sondazhit të fundit të The New York Times, miratimi për presidentin qëndron rreth 38-39%, ndërsa pothuajse 60% e të anketuarve e refuzojnë mënyrën e tij të qeverisjes.

Pesha kryesore vjen nga kombinimi i politikës së jashtme dhe ekonomisë. Lufta me Iranin, ka pasur ndikim të drejtpërdrejtë në çmimet e energjisë: benzina është rritur deri në rreth 4 dollarë për gallon, një dollar më shumë se para konfliktit.

Sipas një sondazhi të Reuters/Ipsos, 77% e amerikanëve i atribuojnë Trump-it të paktën një pjesë të përgjegjësisë për rritjen e çmimeve, me përqindje të larta edhe mes votuesve republikanë.

Pasojat janë të menjëhershme dhe politikisht të ndjeshme. 58% e të anketuarve deklarojnë se do të ishin më pak të prirur të mbështesnin kandidatë që përkrahin linjën e Shtëpisë së Bardhë ndaj Iranit në zgjedhjet e ndërmjetme të nëntorit.

Gjithashtu, avantazhi tradicional i republikanëve në ekonomi është ngushtuar: sot partia është praktikisht në baraspeshë me demokratët, ndërsa në fillim të mandatit kishte një epërsi shumë më të madhe.

Edhe sondazhe të tjera e konfirmojnë këtë prirje. Indeksi i miratimit i publikuar nga CNBC është në nivelet më të ulëta të dy mandateve, me një përkeqësim të ndjeshëm pikërisht në menaxhimin e ekonomisë. Ndërkohë, studimi i AP-NORC Center for Public Affairs Research tregon një pakënaqësi në rritje mes shumë grupeve që kontribuuan në fitoren e vitit 2024, veçanërisht tek të rinjtë hispanikë, të cilët po bëhen gjithnjë e më skeptikë për aftësinë e qeverisë për të përballuar rritjen e kostos së jetesës.

Nga ana tjetër, baza besnike e Trump-it mbetet kryesisht e qëndrueshme, por presidenti po humbet terren mes të pavarurve dhe republikanëve që nuk janë të lidhur me lëvizjen MAGA. Kjo nuk duket të jetë një rënie e zakonshme: për herë të parë në mandatin e dytë, Trump shfaqet i brishtë pikërisht në ekonominë dhe sigurinë, temat që e rikthyen në pushtet. Dhe kur lëkundet premtimi për mirëqenie, zakonisht bie edhe mbështetja publike.