Në përshkallëzimin e përplasjes me Kancelarin e Gjermanisë, Friedrich Merz, presidenti i SHBA-së, Donald Trump, ndërmori një hap të ri, ndërsa Pentagoni amerikan njoftoi se do të tërheqë rreth 5.000 ushtarë amerikanë nga Gjermania brenda një viti, pra afërsisht 15% të forcave që ndodhen aktualisht në vend.
“Parashikojmë që tërheqja të përfundojë brenda gjashtë deri në dymbëdhjetë muajt e ardhshëm”, deklaroi zëdhënësi i Departamentit të Mbrojtjes, Sean Parnell.
Më shumë se 36.000 ushtarë amerikanë janë të stacionuar në Gjermani, sipas një numërimi zyrtar të përfunduar në fund të vitit 2025.
Ky njoftim erdhi pasi Trump kishte deklaruar më herët gjatë kësaj jave se po shqyrtonte mundësinë e reduktimit të forcave amerikane të vendosura në Gjermani, një aleat i SHBA-së në NATO, pas komenteve të Merz që e kishin zemëruar, ku ai tha se “amerikanët duket se nuk kanë asnjë strategji” për Iranin dhe se Teherani “po e poshtëron” superfuqinë botërore.
“Beson se nuk ka problem që Irani të pajiset me armë bërthamore. Nuk e di çfarë thotë”, u përgjigj Trump të martën.
Një ditë më pas, presidenti amerikan shkroi se Uashingtoni ka nisur të studiojë dhe shqyrtojë mundësinë e reduktimit të pranisë ushtarake amerikane në Gjermani. “Një vendim do të merret shumë shpejt”, kishte premtuar ai.
Ligjvënës demokratë, senatorë dhe deputetë, kritikuan dje njoftimin e Pentagonit.
“Duhet të qëndrojmë të bashkuar me aleatët tanë, jo të sabotojmë interesat e sigurisë së njëri-tjetrit për arsye të vogla apo hakmarrje të ngushta”, deklaroi senatorja Jeanne Shaheen. Kolegu i saj, Jack Reed, i bëri thirrje Donald Trump të tërhiqet nga ky vendim, duke e cilësuar atë një “gabim serioz”.
“Reduktimi i pranisë sonë ushtarake në Evropë në një kohë kur forcat ruse vazhdojnë të sulmojnë pa ndërprerje Ukrainën dhe të kërcënojnë aleatët tanë në NATO është një dhuratë e paçmuar për Vladimir Putin dhe tregon se angazhimet amerikane ndaj aleatëve varen nga humori i presidentit”, shtoi senatori demokrat.
Pasojat për Evropën dhe NATO-n
Tërheqja e 5.000 trupave pritet të ndikojë në praninë strategjike të SHBA-së në rajon, por transporti i të plagosurve nga lufta në Iran drejt Gjermanisë nuk pritet të preket, pasi baza e Landstuhl mbetet spitali më i madh ushtarak amerikan jashtë territorit të SHBA-së.
Tërheqja e trupave është pjesë e politikës më të gjerë të Trump për të ushtruar presion ndaj NATO-s dhe vendeve evropiane që të rrisin kontributin e tyre ushtarak.
Trump ka kërcënuar edhe me tërheqjen e SHBA-së nga NATO, duke kritikuar anëtarët për mungesë investimesh në forcat e armatosura dhe varësinë e tyre nga SHBA-ja. Për më tepër, ky hap përputhet me strategjinë e tij më të gjerë për të zhvendosur forcat amerikane drejt rajonit Indo-Paqësor dhe brenda territorit të SHBA-së.
Sipas vëzhguesve ushtarakë të cituar nga Bild, tërheqja nuk pritet të ketë ndikim të madh në sigurinë evropiane. Arsyeja kryesore: shumica e aleatëve të NATO-s po rrisin shpenzimet për kapacitetet e tyre ushtarake dhe po zgjerojnë forcat e armatosura.
Italia dhe Spanja
Ndërkohë, gjithashtu dje, Trump sulmoi në mënyrë të tërthortë edhe Gjermaninë dhe eksportet e saj të mëdha të automjeteve, duke njoftuar se do të rrisë tarifat për automjetet e importuara nga BE në 25% “javën e ardhshme”.
Trump është veçanërisht i zemëruar me aleatët evropianë të SHBA-së sepse nuk janë të gatshëm të kontribuojnë logjistikisht apo ushtarakisht në sulmin izraelito-amerikan ndaj Iranit, apo në sigurinë e Ngushticës strategjike të Hormuzit, e cila në thelb është bllokuar nga Teherani.
Gjatë dy javëve të fundit, republikani ka shtuar kritikat ndaj evropianëve, duke i akuzuar se nuk angazhohen mjaftueshëm për mbrojtjen e tyre dhe NATO-n, si dhe se varen tepër nga mbrojtja ushtarake amerikane. Ai shpesh ka përmendur mundësinë e tërheqjes së SHBA-së.
Përveç Gjermanisë, Trump ka deklaruar se po shqyrton gjithashtu reduktimin e forcave amerikane të stacionuara në Itali dhe Spanjë.
“Ndoshta, pa dyshim që do ta bëj. Pse të mos e bëj?”, u përgjigj ai kur u pyet për këtë mundësi. “Italia nuk ofroi asnjë ndihmë dhe Spanja është e tmerrshme, absolutisht e tmerrshme”, shtoi presidenti amerikan.
Në fund të vitit 2025, në Itali ishin të stacionuar 12.662 ushtarë amerikanë dhe në Spanjë 3.814, sipas një numërimi zyrtar.
Bashkimi Evropian theksoi të enjten se prania e trupave amerikane në Evropë “i shërben gjithashtu interesave të SHBA-së në kuadër të veprimeve të saj globale”.
