Forcimi i kapaciteteve ushtarake të Kosovës, ka qenë fokusi i diskutimeve që komandanti i Forcës së Sigurisë së Kosovës, gjenerallejtënant Bashkim Jashari, i shoqëruar me një delegacion të FSK-së, kanë pasur me prodhues të ndryshëm të armëve gjatë panairit “SAHA Expo 2026” në Stamboll.
Sipas një njoftimi nga Shtabi i Përgjithshëm i FSK-së, Jashari mori pjesë në ceremoninë zyrtare të hapjes, ku u takua me drejtuesit e Mbrojtjes dhe të Forcave të Armatosura të Republikës së Turqisë.
Bëhet e ditur se, gjatë këtij takimi, ai prezantoi objektivat e tij për zhvillimin e Forcës dhe diskutoi planet dypalëshe që lidhen me trajnimet, stërvitjet, pajisjet dhe aktivitetet e tjera të përbashkëta.
Gjenerallejtnant Jashari ndoqi nga afër zhvillimet teknologjike në industrinë e mbrojtjes, në përputhje me objektivat për modernizimin e kapaciteteve të FSK-së.
“Delegacioni zhvilloi gjithashtu takime me prodhues të ndryshëm, me fokus në forcimin e kapaciteteve ushtarake të FSK-së për përmbushjen e misionit të saj”, thuhet në njoftim.
SAHA EXPO 2026 është një platformë kyçe për forcimin e bashkëpunimit me partnerët, ku pjesëmarrja e FSK-së ndihmon në zhvillimin e aftësive moderne në përballimin e sfidave të përbashkëta të sigurisë.
