Ministri izraelit i Sigurisë Kombëtare, Itamar Ben-Gvir, ka shkaktuar reagime të forta ndërkombëtare pasi publikoi një video ku shfaqen aktivistë të flotës humanitare për Gazën të gjunjëzuar, me duar të lidhura dhe të rrethuar nga forcat izraelite.

Në pamjet e publikuara në rrjetet sociale, Ben-Gvir shihet duke tallur të ndaluarit dhe duke valëvitur flamurin izraelit, ndërsa videoja shoqërohej me mbishkrimin: “Mirë se vini në Izrael”.

Sipas organizatës izraelite të të drejtave të njeriut “Adalah”, dhjetëra aktivistë kanë raportuar dhunë fizike dhe psikologjike gjatë arrestimit dhe transferimit në portin e Ashdodit. Tre prej tyre përfunduan në spital, ndërsa disa të tjerë pësuan fraktura në brinjë dhe probleme me frymëmarrjen.

Avokatët deklaruan se të ndaluarit janë detyruar të qëndrojnë në pozicione stresuese për orë të tëra dhe janë përballur me përdorim të plumbave të gomës, armëve me elektroshok dhe poshtërime të ndryshme. Disa gra raportuan se u janë grisur hixhabet gjatë kontrollit.

Videoja ka sjellë reagime të menjëhershme nga disa vende perëndimore, qytetarët e të cilave ndodheshin në flotilje, përfshirë Britaninë, Italinë, Spanjën, Australinë dhe Zelandën e Re.

Kryeministrja italiane Giorgia Meloni e quajti trajtimin “të papranueshëm” dhe kërkoi lirimin e menjëhershëm të qytetarëve italianë.

Ministrja britanike Yvette Cooper deklaroi se ishte “e tmerruar” nga pamjet, ndërsa ministrja australiane Penny Wong i cilësoi ato “tronditëse dhe degraduese”.

Edhe ambasadori amerikan në Izrael, Mike Huckabee, një mbështetës i fortë i Izraelit, reagoi ashpër duke e quajtur sjelljen e Ben-Gvir “të neveritshme”.

Pas zemërimit ndërkombëtar, kryeministri Benjamin Netanyahu u detyrua të distancohej nga ministri i tij. “Mënyra se si Ben-Gvir u soll me aktivistët nuk përfaqëson vlerat e Izraelit”, deklaroi Netanyahu, duke shtuar se kishte urdhëruar deportimin e shpejtë të të ndaluarve.

Edhe ministri i Jashtëm izraelit, Gideon Saar, sulmoi publikisht Ben-Gvirin, duke thënë: “Ti nuk je fytyra e Izraelit.”

Mbi 400 aktivistë nga 40 vende morën pjesë në flotiljen humanitare me 50 anije që ishte nisur nga Turqia drejt Gazës me ndihma ushqimore dhe mjekësore. Forcat izraelite e ndaluan flotiljen në ujërat ndërkombëtare dhe i transportuan aktivistët në Izrael. Ndërkohë, organizatat për të drejtat e njeriut paralajmërojnë se rasti po rrit presionin ndërkombëtar ndaj qeverisë izraelite për trajtimin e të burgosurve dhe operacionet në Gaza.