Politologia ruse, Ekaterina Schulmann, anëtare në Akademinë Robert Bosch në Berlin, thotë se shoqëria ruse dhe elitat shtetërore po bëhen gjithnjë e më të pakënaqura me situatën aktuale dhe vazhdimin e luftës në Ukrainë.
Në një intervistë për Corriere della Sera, ajo theksoi se sondazhet tregojnë se që nga pranvera e vitit 2025 është krijuar një shumicë e qëndrueshme qytetarësh që preferojnë negociatat e paqes dhe përfundimin e armiqësive.
“Për popullsinë, edhe në një kontekst censure dhe represioni ushtarak, ne mbështetemi në anketa që analizojnë nivelet e ankthit, sjelljen e konsumatorëve dhe perceptimet e gjendjes së tyre financiare dhe perspektivave të ardhshme. Ato u përgjigjen pyetjeve të tilla si: ‘A po shkon vendi në drejtimin e duhur?’”
Bazuar në këta tregues, që nga pranvera e vitit 2025, kemi parë një shumicë të konsoliduar qytetarësh të pakënaqur. Dhe ekziston një shumicë e qartë, e qëndrueshme dhe në rritje, në favor të negociatave të paqes ose të përfundimit të armiqësive.”, tha ajo.
Ajo argumenton se, megjithëse sistemi politik rus ka treguar aftësi të madhe përshtatjeje pas pushtimit të Ukrainës në vitin 2022, ai tashmë ka arritur kufijtë e tij. Siç tha politologia, ajo sheh një izolim të madh të presidentit Vladimir Putin nga realiteti me të cilin përballen institucionet dhe shoqëria.
“Në këtë moment të historisë, unë shoh shkallën më të lartë të izolimit dhe kontradiktës: jo aq shumë midis elitave dhe shoqërisë, por midis kreut të sistemit dhe vetë sistemit.”, shtoi ajo.
Ajo theksoi se presidenti rus i kushton vëmendje të madhe sondazheve dhe opinionit publik. Për këtë arsye, Schulmann nuk e përjashton mundësinë që Kremlini të ndërmarrë hapa drejt një pezullimi të përkohshëm të luftimeve, sidomos nëse kjo shihet si e favorshme për stabilitetin e brendshëm politik.
“Do të ketë zgjedhje në vjeshtë. Një mënyrë për të garantuar një fitore zgjedhore në tetor do të ishte promovimi i një armëpushimi ose një pezullimi të përkohshëm të armiqësive. Disa nga kolegët e mi besojnë se çështja e rënies së mbështetjes është, në realitet, një formë presioni që ushtrohet mbi Putinin nga vetë ata që janë përgjegjës për politikën e brendshme.”
