Tymi i dendur nga zjarret masive në Kanada dhe Minesotën veriore ka përkeqësuar ndjeshëm cilësinë e ajrit në shumë zona të Shteteve të Bashkuara, duke detyruar autoritetet të lëshojnë alarme për ndotje të rrezikshme.

Sipas Sistemit Kanadez të Informacionit për Zjarret në Natyrë, deri të shtunën ishin aktive 937 zjarre, shumica e të cilave ishin jashtë kontrollit.

Presidenti amerikan Donald Trump reagoi në rrjetin Truth Social, duke akuzuar Kanadanë se nuk po menaxhon siç duhet pyjet e saj.

“Kjo është neglizhencë e qëllimshme dhe po kthehet në një problem të përvitshëm që i kushton Shteteve të Bashkuara miliarda dollarë”, shkroi Trump. Ai shtoi se kostoja e ndotjes duhet të përfshihet në tarifat që SHBA-të vendosin ndaj Kanadasë.

Trump deklaroi gjithashtu se do të bisedojë me kryeministrin kanadez Mark Carney për të diskutuar masat që do të merren ndaj situatës.

Nga ana tjetër, ministrja kanadeze për Menaxhimin e Emergjencave tha se Kanadaja dhe SHBA-të janë në kontakt të vazhdueshëm dhe kanë një histori të gjatë bashkëpunimi në luftën kundër zjarreve. Ajo theksoi se Kanadaja ka investuar rreth 12 miliardë dollarë në mbrojtjen e pyjeve dhe parandalimin e zjarreve që nga viti 2020.

Ndotja e ajrit ka prekur rëndë qytetet amerikane. Detroiti u rendit si qyteti më i ndotur në botë, ndërsa edhe Washingtoni dhe Chicago regjistruan nivele shumë të larta ndotjeje. Autoritetet u kanë bërë thirrje qytetarëve të shmangin qëndrimin e panevojshëm jashtë.

Situata ka ngritur shqetësime edhe për finalen e Kupës së Botës që zhvillohet të dielën, 19 korrik, në New Jersey, pasi tymi mund të ndikojë në cilësinë e ajrit gjatë ndeshjes.

Ekspertët paralajmërojnë se grimcat e imta të tymit nga zjarret janë veçanërisht të rrezikshme për mushkëritë. Tymi mund të përmbajë jo vetëm mbetje druri dhe bimësh, por edhe grimca plastike, metali dhe materialesh të tjera të djegura, duke u bërë edhe më toksik ndërsa përhapet në atmosferë.

Shkencëtarët theksojnë se ndryshimet klimatike po zgjasin sezonin e zjarreve, pasi temperaturat më të larta dhe thatësira krijojnë kushte që flakët të përhapen dhe të zgjasin për javë të tëra.

Ndërkohë, zjarret vazhdojnë të përhapen në disa provinca të Kanadasë dhe në pyjet pranë kufirit me SHBA-të, ndërsa autoritetet paralajmërojnë se erërat dhe moti i paqëndrueshëm po e bëjnë edhe më të vështirë shuarjen e tyre.