Kriza në Detin e Kuq ka hyrë në një fazë të re dhe më të rrezikshme, pasi rebelët Huthi të Jemenit kanë shpallur ndalimin e plotë të trafikut detar drejt dhe nga të gjitha portet e Arabisë Saudite.
Vendimi u bë i ditur përmes një njoftimi urgjent të Qendrës së Koordinimit të Operacioneve Humanitare (HOCC), drejtuar pronarëve të anijeve, kompanive të menaxhimit dhe operatorëve të transportit detar në mbarë botën. Masa ka hyrë në fuqi më 20 korrik 2026, në orën 15:01 sipas kohës lokale të Sanaas (12:01 UTC).
Sipas njoftimit, çdo anije ndalohet të ngarkojë ose shkarkojë mallra në çdo port saudit. Huthit paralajmërojnë se anijet që nuk respektojnë këtë vendim mund të përballen me sanksione dhe të bëhen objektiv i sulmeve “në çdo pikë brenda rrezes operative të Forcave të Armatosura të Jemenit”.
Në deklaratën e tyre, Huthit e arsyetojnë vendimin duke pretenduar se Arabia Saudite vazhdon të mbajë bllokadën ndaj Jemenit, e cila sipas tyre zgjat prej afro 12 vitesh. Ata akuzojnë gjithashtu Riadin për operacione ushtarake, shkelje të hapësirës ajrore të Jemenit dhe sulme ndaj Aeroportit Ndërkombëtar të Sanaas, duke pretenduar se këto veprime po e thellojnë krizën humanitare në vend.
HOCC u ka bërë thirrje kompanive të transportit detar të tregojnë “kujdes maksimal” gjatë planifikimit të lundrimeve, duke rekomanduar shmangien e çdo udhëtimi drejt ose nga portet saudite për të garantuar sigurinë e anijeve dhe ekuipazheve.
Ky zhvillim pritet të rrisë shqetësimet në industrinë globale të transportit detar. Arabia Saudite është një nga eksportuesit më të mëdhenj të naftës në botë dhe portet e saj janë nyje të rëndësishme për trafikun e cisternave të naftës, anijeve të mallrave dhe kontejnerëve.
Nëse kërcënimet e Huthive zbatohen në praktikë, ekspertët paralajmërojnë se mund të ketë rritje të ndjeshme të kostove të sigurimit detar, primeve të luftës dhe tarifave të transportit, si edhe devijime të rrugëve detare dhe ndërprerje të reja në zinxhirët globalë të furnizimit.
