Irani ka pezulluar përkohësisht sulmet hakmarrëse ndaj aleatëve të Shteteve të Bashkuara në Lindjen e Mesme, ndërsa Uashingtoni ka shmangur për të dytën natë radhazi goditje të reja ndaj territorit iranian. Megjithatë, tensionet mbeten të larta dhe Teherani paralajmëron se përplasja mund të përhapet në vende të tjera të rajonit.
Një zyrtar i lartë ushtarak iranian ka bërë të ditur se konflikti mund të marrë përmasa më të gjera, duke përfshirë edhe veprime nga grupet aleate të Iranit.
Në këtë kuadër, vëmendja është drejtuar te rebelët Huthi në Jemen, të cilët mund të shtojnë sulmet ndaj anijeve tregtare dhe ushtarake që lëvizin në Detin e Kuq.
Qetësia relative e natës së 26 korrikut vjen pak përpara takimit të planifikuar në Uashington mes presidentit amerikan Donald Trump dhe kryeministrit izraelit Benjamin Netanyahu, i cili pritet të zhvillohet më 28 korrik.
Vizita e Netanyahut përkon me pesë muaj nga nisja e operacioneve të gjera ajrore amerikane dhe izraelite kundër objektivave në Iran.
Pas këtyre sulmeve, Teherani nisi kundërpërgjigje ndaj aleatëve të SHBA-së në Lindjen e Mesme dhe ndërmori masa që ndikuan në trafikun detar në Ngushticën e Hormuzit.
