Rusia po përballet me vështirësi në rekrutimin e ushtarëve të rinj për luftën në Ukrainë, ndërsa humbjet në front dhe ngadalësimi i rekrutimit vullnetar kanë rritur spekulimet për një mobilizim të ri. Megjithatë, deri tani nuk ka shenja se Vladimir Putin ka marrë vendim për një mobilizim masiv.

Në analizën e “The Guardian” theksohet se Moska po përpiqet të plotësojë radhët e ushtrisë kryesisht përmes kontratave vullnetare me paga dhe bonuse të larta. Sipas ekspertëve të cituar në material, Rusia po rekruton rreth 1,000 ushtarë në ditë, por një pjesë e madhe e tyre po përdoret për të zëvendësuar humbjet dhe jo për të zgjeruar ndjeshëm kapacitetin ofensiv.

Kremlini ende nuk ka sinjalizuar një thirrje të re masive, ndërsa zyrtarë rusë i kanë hedhur poshtë raportet për një mobilizim të afërt. Pas mobilizimit të rreth 300 mijë rezervistëve në shtator 2022, Moska ka shmangur një tjetër mobilizim të gjerë dhe është mbështetur te rekrutimi me kontrata. Për ushtarët ofrohen bonuse të mëdha nënshkrimi dhe paga që në disa raste përbëjnë disa vite të ardhura për banorët e rajoneve më të varfra të Rusisë.

Por aktivistë dhe persona të angazhuar në çështjet e rekrutimit thonë se presioni ndaj kandidatëve është rritur. Në disa rajone raportohet se burra janë ndaluar nga policia, marrë nga vendet e punës ose dërguar në zyrat e rekrutimit, ku më pas janë përballur me presion për të nënshkruar kontrata.

Aktivistët thonë se vetë frika për një mobilizim të ri po përdoret si mjet presioni. Mesazhi që u përcillet kandidatëve është se mobilizimi mund të ndodhë gjithsesi dhe se nënshkrimi i një kontrate tani u jep atyre mundësinë të përfitojnë pagesat përpara një thirrjeje të detyruar. Rekrutimi po shtrihet edhe në universitete, shkolla profesionale dhe te të burgosurit që plotësojnë kushtet për të lidhur kontrata me ushtrinë.

Një pjesë e madhe e objektivave të rekrutimit u është deleguar rajoneve ruse. Guvernatorët dhe administratat lokale duhet të sigurojnë numrin e kërkuar të rekrutëve, ndërsa janë krijuar edhe skema financiare për personat që bindin të tjerë të bashkohen me ushtrinë.

Sipas të dhënave të cituara në material, rajonet ruse u kanë paguar rekrutuesve të paktën 7.7 miliardë rubla, rreth 96 milionë dollarë, që nga krijimi i këtyre skemave. Por rekrutuesit pranojnë se gjetja e kandidatëve është bërë më e vështirë.

Një tjetër mobilizim masiv do të ishte një vendim i rrezikshëm për Kremlinin. Mobilizimi i vitit 2022 shkaktoi protesta dhe largimin e një numri të madh rusësh jashtë vendit.

Ndërkohë, sondazhet e fundit të cituara në material tregojnë një rënie të besimit se lufta në Ukrainë po shkon mirë për Rusinë. Për momentin, analistët vlerësojnë se Moska ka më shumë gjasa të rrisë bonuset e rekrutimit, të shtojë presionin mbi administratat rajonale dhe të përdorë metoda më shtrënguese, përpara se të marrë në konsideratë një mobilizim të ri masiv.

Nëse këto masa nuk mjaftojnë për të siguruar numrin e nevojshëm të ushtarëve, Kremlini mund të përballet sërish me dilemën e një mobilizimi të ri, qoftë masiv apo më selektiv.