Presidenti i Koresë së Jugut, Lee Jae-myung, ka bërë thirrje për rifillimin e dialogut me Korenë e Veriut, duke propozuar hapa drejt bashkëjetesës paqësore dhe zëvendësimin e armëpushimit të Luftës Koreane me një marrëveshje të qëndrueshme paqeje. Në një fjalim me rastin e përvjetorit të çlirimit të Koresë nga sundimi japonez, Lee tha se dy Koretë duhet të rikthehen në tryezën e negociatave. Ai theksoi se Seuli do të kërkojë garanci të reja për të shmangur përshkallëzimin e tensioneve dhe për të ulur rrezikun e një konflikti të armatosur.
Presidenti koreano-jugor kërkoi gjithashtu bisedime me Phenianin dhe palët e tjera të interesuara për t’i dhënë fund zyrtarisht Luftës Koreane të viteve 1950-1953, e cila përfundoi me armëpushim dhe jo me një traktat paqeje. Një tjetër pikë e rëndësishme e propozimit të Lee është kufizimi i aftësive bërthamore të Koresë së Veriut. Ai tha se Seuli do të ndërmarrë masa të vazhdueshme për uljen e tensioneve dhe krijimin e mekanizmave të sigurisë që do të parandalonin përshkallëzimin.
Megjithatë, marrëdhëniet mes dy vendeve mbeten të tensionuara. Udhëheqësi i Koresë së Veriut, Kim Jong Un, ka hequr dorë nga politika e ribashkimit dhe e ka cilësuar Korenë e Jugut si shtetin më armiqësor, ndërsa ka urdhëruar forcimin e mbrojtjes përgjatë kufirit.
Pheniani ka kundërshtuar më herët nismat e Lee-së, duke kritikuar edhe planet e Seulit për nëndetëse me energji bërthamore dhe stërvitjet e përbashkëta ushtarake mes SHBA-së dhe Koresë së Jugut. Në fjalimin e tij, Lee foli edhe për marrëdhëniet me Japoninë, duke kërkuar që e kaluara të përballet me kujdes dhe duke shprehur shpresën për një periudhë të re bashkëpunimi dhe prosperiteti mes dy vendeve.
