Një prej katastrofave natyrore më të rënda të viteve të fundit ka goditur Nepalin dhe zonat pranë kufirit me Tibetin, ku përmbytjet masive dhe rrëshqitjet e dheut kanë shkaktuar qindra viktima dhe kanë lënë mijëra persona të zhdukur.
Bilanci i viktimave vijon të rritet, ndërsa ekipet e shpëtimit po përballen me kushte jashtëzakonisht të vështira në përpjekje për të gjetur të mbijetuarit.
Sipas të dhënave të fundit të autoriteteve nepaleze, të paktën 734 persona kanë humbur jetën, ndërsa 2,498 të tjerë rezultojnë të zhdukur. Më shumë se 8,000 persona janë shpëtuar, ndërsa rreth 20,000 efektivë të forcave të sigurisë janë angazhuar në operacionet e kërkim-shpëtimit.
Katastrofa ndodhi të mërkurën, kur një masë gjigante akulli, shkëmbinjsh dhe balte u shkëput në lartësitë e Himalajeve dhe shkaktoi një rrjedhë shkatërruese që u përhap përgjatë lumenjve Trishuli dhe Bhote Koshi.
Në orët e para u raportua se një tërmet mund të kishte shkaktuar katastrofën. Megjithatë, analizat e mëvonshme nga shkencëtarët kanë orientuar hetimet drejt një tjetër shkaku.
Sipas këtyre analizave, katastrofa lidhet me shembjen e një akullnaje dhe krijimin e një rrjedhe gjigante mbetjesh, e cila përfshiu dhe shkatërroi zona të tëra gjatë rrugës së saj.
Forcat e shpëtimit po vijojnë kërkimet në zonat e prekura, ndërsa përmasat e dëmeve dhe bilanci i plotë i viktimave pritet të bëhen më të qarta në vijim.
