Bashkimi Europian ka vendosur ChatGPT-në nën një nivel të ri dhe më të rreptë mbikëqyrjeje, duke e klasifikuar për herë të parë një chatbot me inteligjencë artificiale si motor kërkimi online shumë të madh në kuadër të Aktit të Shërbimeve Digjitale (DSA).
Vendimi i Komisionit Europian prek gjithashtu Reddit dhe Roblox, të cilat janë klasifikuar si platforma online shumë të mëdha. Të tria shërbimet kanë deklaruar se kanë të paktën 45 milionë përdorues mesatarë në muaj në Bashkimin Europian, duke kaluar kështu pragun e përcaktuar nga legjislacioni europian.
Sipas klasifikimit të ri, ChatGPT do të përballet me kërkesa shtesë për vlerësimin dhe reduktimin e rreziqeve sistemike që mund të krijohen nga shërbimi dhe sistemet e tij algoritmike. Këto rreziqe përfshijnë përhapjen e përmbajtjeve të paligjshme, ndikimin te të miturit, mirëqenien fizike dhe mendore të përdoruesve, të drejtat themelore, proceset zgjedhore dhe sigurinë publike.
Mediat e huaja raportojnë se ky është një zhvillim i rëndësishëm për industrinë e inteligjencës artificiale, pasi është hera e parë që një chatbot i tillë përfshihet në kategorinë e shërbimeve që i nënshtrohen nivelit më të lartë të kontrollit sipas DSA. Komisioni Europian argumenton se ChatGPT, për shkak të aftësisë për t’iu përgjigjur pyetjeve dhe për të kërkuar informacion në internet, mund të konsiderohet një shërbim hibrid që përmbush kriteret e një motori kërkimi.
OpenAI, kompania që qëndron pas ChatGPT-së, do të ketë katër muaj kohë për të përmbushur detyrimet e reja. Në këtë kuadër pritet të ketë kontrolle më të mëdha mbi mënyrën se si funksionojnë sistemet algoritmike dhe se si menaxhohen rreziqet që lidhen me përdoruesit. Komisioni Europian do të ketë gjithashtu kompetenca hetimore për të shqyrtuar funksionimin e këtyre shërbimeve dhe sistemeve të lidhura me to.
Vendimi shihet si një precedent i rëndësishëm për mënyrën se si Bashkimi Europian do të trajtojë platformat e mëdha të inteligjencës artificiale në të ardhmen. Ndërsa përdorimi i chatbotëve AI po zgjerohet me shpejtësi, Brukseli po përpiqet të vendosë rregulla më të forta për sigurinë, transparencën dhe përgjegjshmërinë e kompanive teknologjike. Nëse kompanitë nuk përmbushin detyrimet e përcaktuara nga Akti i Shërbimeve Digjitale, ato mund të përballen me masa ndëshkuese dhe gjoba të konsiderueshme.
