Tri ditë pas miratimit të importit të plehrave në Shqipëri, ka folur kryetari i PD-së Lulzim Basha, i cili shpjegon arsyet përse sipas tij, kryeministri Rama lejoi importin e mbetjeve në Shqipëri. Sipas Bashës, një pjesë e tregtisë ndërkombëtare të plehrave është nën kontrollin e grupeve të dyshimta dhe kriminale. Të gjithë ata kërkojnë të gjejnë vende ku nuk ka rend e siguri, ku politikanët të korruptuar janë të gatshëm të shiten për para dhe Shqipëria e Edi Ramës është vendi ideal për këtë gjë”.

Kryeopozitari thekson se në një vend si Shqipëria, ku nuk mund të garantohet siguria ushqimore, nuk mund të pretendohet kontrolli i mbetjeve që do të importohen. Sipas tij, plehrat do të sjellin helm në Shqipëri.

Deklarata e plotë e Bashës:

Miratimi i ligjit të plehrave është një tjetër provë e qartë se qeveria Rama e ka braktisur përfundimisht interesin publik dhe i shërben vetëm një pakice që po pasurohet në kurriz të shumicës. Ky ligj i miratuar në kushte kur kishte dhe ka një vullnet të qartë popullor kundra tij është bërë vetëm për një arsye: për interesa korruptive dhe kriminale.
Mbasi e miratoi pabesisht ligjin, tashmë Rama ka filluar një fushatë manipulimi, kërcënimi dhe keqinformimi të publikut për t’i detyruar njerëzit të mbyllin gojën dhe t’i nënshtrohen vullnetit të tij.
Qeveria e tij nuk garanton dot as sigurinë ushqimore të produkteve që hyjnë në vend, por Rama do që ne të besojmë se ai do kontrollojë plehrat që ai do importojë.
Loja me plehrat është lojë e rrezikshme. Kudo në botë gjenden mijëra tonë mbetje të rrezikshme dhe të dëmshme që presin të shkarkohen diku. Është fakt se një pjesë e tregtisë ndërkombëtare të plehrave është nën kontrollin e grupeve të dyshimta dhe kriminale. Të gjithë ata kërkojnë të gjejnë vende ku nuk ka rend e siguri, ku politikanët të korruptuar janë të gatshëm të shiten për para.
Shqipëria e Edi Ramës është vendi ideal për këtë gjë. Në Shqipëri sot trafikohen me dhjetëra mijëra tonë drogë. Në Shqipëri, policia, administrata publike dhe drejtuesit më të lartë të vendit janë të korruptuar dhe të kapur nga bizneset klienteliste dhe nga krimi. Në këto kushte është e sigurt: plehrat do të sjellin helm në Shqipëri, helm për fëmijët tanë dhe për gjithë vendin.
Shqipëria pa Edi Ramën do të jetë një Shqipëri pa plehra. #Shqipëria më mirë pa Edi Ramën.