Kryeministri Edi Rama ka reaguar pas zgjedhjes së kryetares së komanduar të bashkisë Himarë, Blerina Balan.
Përmes një postimi në rrjete sociale ai thekson se me këtë zgjedhje u tregua se shumica e himariotëve nuk i përkasin llogores së konfliktit dhe përçarjes.
Sipas tij, zgjedhja e sotme nga Këshilli Bashkiak të Himarës, është një zhvillim pozitiv për vazhdimin e punës së qeverisë vendore.
“Zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore.
Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himariotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat e Himarës”, shkruan Rama.
