Pesë fëmijë kanë humbur jetën, ndërsa një grua ka mbetur e plagosur si pasojë e një zjarri që ka rënë në një kopsht në Pensilvani duke shkaktuar tragjedi.
Ngjarja ka ndodhur në qytetin e Erie dhe po hetohet për shkaqet e zjarrit. Autoritetet kanë bërë me dije që viktimat ishin të moshës nga 8 muajsh në 7 vjeç. Flakët kanë rënë herët në mëngjes, ku në brendësi flinin shumë fëmijë.
Ky është një kopsht i hapur 24 orë në 24, për prindërit që punojnë edhe natën. Mes viktimave janë katër fëmijë nga e njëjta familje, dy motra dhe dy vëllezër, nga 10 muajsh deri në 8 vjeç.
Alarmin e ka dhënë një djalë 17-vjeçar që banonte aty pranë. Ndërhyrja e forcave zjarrfikëse ka qenë e menjëhershme dhe me ndihmën e disa personave në vendin e ngjarjes kanë arritur të shpëtohen shumë fëmijë. Një vajzë 12-vjeçare arriti të shpëtojë duke u ngjitur në çatinë e ndërtesës.
Nga dëshmitë e para duket që flakët janë nisur nga salloni i katit të parë, por ende nuk dihet shkaku që provokoi zjarrin, që u shpërnda me shpejtësi të madhe në godinë, duke e bërë të vështirë ndërhyrjen e zjarrfikësve.
