23 nëntor 2014 –  Mesfushori i Kombëtares shqiptare, Amir Abrashi, do të qëndrojë jashtë fushave së paku dy muaj, duke mbyllur kështu aktivizimin për këtë vit. Lajmi është konfirmuar nga klubi i Grasshopersit, teksa dëmtimi i lojtarit në kavilje ka bërë që mungesa e tij të zgjasë minimalisht deri në janar të 2015-ës. Tashmë ai nuk do të jetë i gatshëm për skuadrën zvicerane, ndërsa deri në takimin e radhës së Kombëtares, koha premton, pasi Shqipëria luan kundër Armenisë më 29 mars të vitit 2015. “Amiri do të mungojë deri në pushimin mes dy fazave. Aktualisht është kthyer nga dëmtimi Salatiç dhe kjo na ngroh disi, pasi, nëse edhe ai bashkë me Amirin nuk do të ishin, atëherë mesfusha jonë do të kishte shumë probleme”, deklaroi për gazetën zvicerane “Blick”, trajneri i Grasshopersit, Mikael Skibe. Kujtojmë që Abrashi është një ndër titullarët e padiskutueshëm të skuadrës zvicerane, ndërkohë që edhe në takimet e fundit ka qenë gjithnjë zgjedhje e parë nga ana e trajnerit të Shqipërisë, De Biazi. Mesfushori është nën kontratë me Grasshopers edhe për një sezon tjetër, por gjasat janë që të shitet, teksa kërkesat për kosovarin kanë qenë të shumta, madje edhe nga klube të Serisë A.