Anëtarët e bandës shqiptare që dyshohet se vranë një 23-vjeçar në Cardiff, Britani synonin t’i “jepnin një mësim” në vend që ta vrisnin. Kështu është thënë në Gjykatë, pasi trupi i Tomasz Waga u gjet me lëndime të shumta në zonën Penylan të qytetit në janar 2021.
Ai u kap nga grupi i shqiptarëve duke vjedhur shtëpinë e tyre të barit në Newport Road në zonën Roath të qytetit.
Josif Nushi, Mihal Dhana, Gledis Mehalla, Mario Qato dhe Hysland Aliaj e mohuan vrasjen.
Të mërkurën, gjykata dëgjoi se Waga dhe një burrë tjetër, Carl Davies, po përpiqeshin të vidhnin një shtëpi bari me vlerë 120,000 £.
Prokurori Greg Bull KC tha: “Nuk kishte domosdoshmërisht një tentativë vrasje këtu, por kishte një qëllim për të bërë një dëm vërtet serioz për t’i dhënë atij një mësim dhe për të marrë sa më shumë informacion prej tij që të mundeshin në mënyrë që ata dhe shefat e tyre të mund t’i merrnin gjërat më seriozisht.
“Ata në fakt e rrëmbyen dhe e futën në makinën Mercedes,” tha ai.
Ai tha se qëllimi i tyre ishte ta merrnin në pyetje.
Trupi gjykues iu tha se të gjithë të pandehurit përveç Mario Qatos, ikën në Shqipëri. Qato u arrestua më vonë pas ngjarjes. Katër të pandehurit e tjerë u arrestuan në Shqipëri dhe u ekstraduan në Britaninë e Madhe, shkruan media britanike.
Jurisë iu tha se provat mjeko-ligjore treguan se gjurmë gjaku u gjetën në një numër vendesh të lidhura me rastin.
Bull tha se jurisë do t’i shfaqen të dhënat telefonike të komunikimit midis të pandehurve.
