Kur banka qendrore e Holandës konfirmoi këtë javë se kishte zhvendosur tonelata ar nga Amerika e Veriut, ajo tha se kjo do ta bënte “më të përgatitur për kriza të rënda”.

Rreth 86 ton ar nga totali i kombinuar prej rreth 313 ton që mbaheshin në SHBA dhe Kanada u zhvendosën në Londër për shkak të trazirave gjeopolitike në rritje, deklaroi banka holandeze, duke shtuar se në këtë mënyrë mund të ishte “lehtësisht i disponueshëm për përdorim në një situatë krize”.

Lëvizja ishte qartësisht në përgjigje të gjendjes së paqëndrueshme dhe të pasigurt në të cilën ndodhet bota, me luftërat tregtare dhe ushtarake që i shtyjnë vendet të marrin masa paraprake dhe ta mbajnë arin e tyre më afër vendit, raporton BBC.

Më parë këtë vit, Franca njoftoi se kishte hequr rezervat e saj të arit nga SHBA. Ndërkohë, Bundesbank e Gjermanisë transferoi më shumë se 216 ton ar nga vendet ku e kishte depozituar jashtë vendit, 111 ton nga Nju Jorku dhe 105 ton nga Parisi.

Është një strategji që është luajtur më parë në kohë të paqëndrueshmërisë globale. Disa banka qendrore evropiane zhvendosën një pjesë të rezervave të tyre të arit në Nju Jork gjatë Luftës së Ftohtë.

De Nederlandsche Bank tha se ari i nxjerrë nga SHBA-të dhe Kanadaja midis marsit dhe gushtit të këtij viti tani mbahej në kasafortat e Bankës së Anglisë.

“Ne presim që nuk do të na duhet kurrë t’i përdorim ato, por duhet të forcojmë qëndrueshmërinë dhe përgatitjen tonë”, tha guvernatori i bankës qendrore holandeze, Olaf Sleijpen.

Londra u pa si zgjedhja më e mirë për shkak të pozicionit të saj në botë si një qendër e madhe tregtare. Nëse dëshiron të jesh në gjendje të blesh apo të shesësh ar me shpejtësi në një krizë, Londra është vendi i duhur, gjë që e bën Bankën e Anglisë një vend të njohur të depozitimit të tij. Banka e Anglisë në Londër mban shumë shufra ari në kasafortat e saj.

Banka është një nga kujdestarët më të mëdhenj të arit në botë. Në institucionin 300-vjeçar në Londrën qendrore ndodhen rreth 400 mijë shufra ari me vlerë më shumë se 200 miliardë paund.

Sipas anketave të industrisë nga Këshilli Botëror i Arit, Banka e Anglisë mbetet vendi më i popullarizuar, por bankat qendrore po diversifikojnë gjithnjë e më shumë se ku e ruajnë metalin e çmuar.

Ari ka pasur një moment të rëndësishëm vitet e fundit. Çmimi i tij është rritur duke arritur një seri rekordesh, duke kaluar 5 mijë dollarë për ons në janar.

Ka disa arsye për rritjen e vlerës së tij, por një faktor kryesor ka qenë pozicioni i metalit të çmuar në psikikën njerëzore si një aset i ashtuquajtur strehë e sigurt, për të investuar gjatë periudhave të trazirave financiare dhe gjeopolitike të shkaktuara nga luftërat tregtare dhe ushtarake.

Ndërsa çmimi i arit ka rënë nga niveli rekord në fillim të këtij viti, ai ende mbetet në një nivel historikisht të lartë. Sipas studiuesve të Goldman, çmimi parashikohet të rritet në 4 mijë e 900 dollarë për ons deri në fund të vitit 2026, 300 dollarë më shumë se sa ishte në gusht. Kërkesa për ar nga bankat qendrore është një arsye kryesore pse çmimet po rriten, sipas Thomas dhe Struyven.