28 nëntor 2014 –  Dy kampionë bote për të ngritur në qiell flamurin shqiptar. Daniel Godelli dhe Romela Begaj ngritën flamurin kuqezi në Vlorë me rastin e ceremonisë për 102 vjetorin e Pavarësisë ku morën pjesë personalitetet më të larta të shtetit shqiptar. Nën tingujt e himnit shqiptar, kampioni nga Peqini dhe 28-vjeçarja nga Tirana ngritën flamurin në mënyrë simbolike në Sheshin e Flamurit, ku ishin të pranishëm edhe qindra qytetarë vlonjatë. Kjo është hera e parë që kampionët e sportit shqiptar përzgjidhen për të nderuar kombin gjatë festës së Pavarësisë edhe pse një gjë të tillë ata e kanë bërë në çdo arenë që kanë garuar. Por nuk është vetëm peshëngritja kryefjala e sportit në Vlorë sepse përmes një postimi në rrjetin social Facebook, kryeministri, Edi Rama premtoi nisjen e punimeve për ndërtimin e stadiumit të ri të Flamurtarit. “Stadiumi i rehabilituar i Flamurtarit se shpejti projekti edhe per Arenen e re te Vlores”, shkruan kreu i qeverisë, duke konfirmuar vëmendjen e kabinetit që ai drejton ndaj investimeve në sport pasi disa javë më parë ai dha lajmin e nisjes së punimeve për rikonstruksionin e stadiumit të Shkodrës “Loro Boriçi”.