Një nga koleksionet më të rëndësishme të artefakteve prehistorike prej ari në Evropë është grabitur nga një muze në Spanjën juglindore.

Sipas transmetuesit lokal Cadena SER, autorët kanë marrë të 66 objektet origjinale të Thesarit të Villenës, një koleksion rreth 3 mijë vjeçar.

Policia lokale dhe Garda Civile rrethuan Muzeun e Villenës, në provincën e Alicante-s, ndërsa hetuesit nisën mbledhjen e provave dhe rindërtimin e mënyrës se si ndodhi grabitja. Autoritetet spanjolle ende nuk kanë dhënë një deklaratë zyrtare për ngjarjen.

Sipas raportimeve, hajdutët hynë në muze duke dëmtuar dhe hequr një dritare anësore të ndërtesës. Koleksioni i vjedhur peshon rreth 10 kilogramë dhe përfshin tasa, byzylykë dhe objekte zbukuruese të punuara me ar, argjend, qelibar dhe hekur.

Grabitja është veçanërisht e rëndë për shkak se janë marrë pjesët origjinale të thesarit. Për një periudhë të gjatë, muzeu kishte ekspozuar një kopje të koleksionit, ndërsa artefaktet autentike u vendosën në muzeun e ri të qytetit, i cili u hap dy vite më parë.

Hetuesit po shqyrtojnë edhe mundësinë që një alarm i rremë i regjistruar pak para grabitjes në një qendër sportive komunale të jetë përdorur për të shpërqendruar forcat e sigurisë. Gjithashtu, po hetohet nëse pas grabitjes qëndron një grup i specializuar në vjedhjen e objekteve historike apo nëse artefaktet janë marrë me porosi.

Thesari i Villenës u zbulua në dhjetor të vitit 1963, kur pjesa më e madhe e objekteve u gjet e fshehur në një enë të varrosur në një shtrat të thatë lumi pranë Villenës.

Koleksioni konsiderohet me rëndësi të jashtëzakonshme për studimin e përpunimit të metaleve gjatë periudhës prehistorike në Mesdheun Perëndimor.

Ai renditet ndër koleksionet më të rëndësishme të objekteve prej ari të Epokës së Bronzit, së bashku me thesaret e zbuluara në varret mbretërore të Mikenës në Greqi.

Dy prej objekteve janë veçanërisht të rralla, pasi studimet shkencore kanë sugjeruar se ato janë prodhuar nga hekur me origjinë meteoritike. Kjo mund t’i vendosë ato në Epokën e Vonë të Bronzit, përpara zhvillimit të përpunimit të hekurit nga mineralet tokësore në këtë rajon.

Për shkak të rëndësisë së tyre historike dhe arkeologjike, vlera e 66 artefakteve të grabitura konsiderohet e pallogaritshme.