Kombëtarja shqiptare e futbollit ka pësuar dy humbje radhazi në miqësoret e qershorit nën drejtimin e trajnerit Rolando Maran. Këto humbje kanë kushtuar shtrenjtë si për faktin se nuk u pa hapi para që pritej me trajnerin italian, por edhe për rrëshqitjen e vazhdueshme në renditjen e FIFA-s.
Humbja ndaj skuadrës që mban vendin e 98 në renditjen e FIFA-s, ajo ndaj Luksemburgut, i ka kushtuar Shqipërisë -6,45 pikë dhe duke i shtuar edhe ato të humbura ndaj Izraelit, ka çuar totalin e pikëve të humbura për këto dy ndeshje në 12,03.
Si rrjedhojë, Shqipëria ka rrëshqitur me një pozicion pas secilës prej ndeshjeve, duke e parë tashmë veten në vendin e 66-të në klasifikimin e FIFA-s, 2 më poshtë në krahasim me muajin e kaluar në renditjen që do të zyrtarizohet më 10 qershor, para fillimit të Botërorit.
Pas Bosnjës, kuqezinjtë janë kaluar tashmë edhe nga Hondurasi, ndërsa janë afruar ndjeshëm ekipet e Kepit të Gjelbër, Emirateve të Bashkuara Arabe dhe Maqedonisë së Veriut.
