Rastet me COVID-19, sa vijnë e shtohen në tërë territorin e Republikës së Kosovës, ku deri më tani janë infektuar gjithsej 4 mijë e 931 persona, prej të cilëve 2 mijë e 561 janë ende raste aktive.
Një situatë e tillë ku do të ketë raste të të infektuarve me virus në mbarë botën, do të zgjasë edhe së paku gjashtë muaj. Kështu të paktën deklaron infektologu kosovar, Izet Sadiku.
“Lufta” me Covid-19 pritet të përfundojë në momentin që zbulohet vaksina kundër këtij virusi.
Izet Sadiku duke bërë thirrje që të respektohen masat parandaluese derisa të zbulohet një vaksinë kundër Covid-19, u shpreh se duhet të mësohemi të jetojmë me virusin së paku edhe për 6 muaj, pasi sipas tij edhe Organizata Botërore e Shëndetësisë nuk premton që kjo situatë do të kalojë shpejt, pa u zbuluar vaksina.
Sadiku në një intervistë në RTV21 ka thënë se kapacitetet e spitaleve publike pothuajse janë mbushur pasi po trajtohen mbi 300 pacientë prej të cilëve mbi 170 janë me oksigjenoterapi.
