Ka përfunduar me sukses etapa e tretë e “Giro d’Italia” që u zhvillua në territorin shqiptar, në një itinerar spektakolar prej 160 kilometrash që përshkoi zonat piktoreske nga Vlora, përmes Kuçit, Qeparos, Himarës, Llogarasë dhe sërish në Vlorë.
Fitues i kësaj etape është shpallur çiklisti danez Mads Pedersen, i cili ka fituar dy nga tre etapat e para të kësaj gare prestigjioze, duke u konfirmuar aktualisht si lideri i “Giro d’Italia 2025”.
29-vjeçari rimerr fanellën rozë, pasi kujtojmë se ai ishte fitues edhe në etapën e parë, në garën që u zhvillua nga Durrësi në Tiranë.
Me përfundimin e kësaj etape, “Giro d’Italia” mbyll edhe qëndrimin e saj në Shqipëri, për të vijuar më tej me garat në territorin italian.
Organizatorët kanë vlerësuar lart mikpritjen dhe peizazhet e Shqipërisë, ndërsa gara solli emocione të veçanta për sportdashësit dhe promovoi turizmin shqiptar në një nivel ndërkombëtar.
Sa i përket garës në Vlorë, në vendin e dytë u rendit Corbin Strong, i ndjekur nga Orluis Aular dhe Brandon Rivera.
Në renditjen e përgjithshme, Pedersen mban vendin e parë, i ndjekur nga Roglic dhe Vacek.
Etapat e tjera të garave do të vazhdojnë në Itali, pas tre etapave të para në Shqipëri.
