Arrestimi i dy vëllezërve në qytetin e Sarandës ishte pikënisja e çështjes ndaj oficerit të policisë gjyqësore, Edmond Ruçi. Ky i fundit ra në pranga mbrëmjen e djeshme i dyshuar për veprën penale të “korrupsionit pasiv të personave që ushtrojnë funksione publike”.
Ruçi kishte dijeni për veprimtarinë kriminale të dy vëllezërve, konkretisht trafikimin e lëndëve narkotike. Pasi ata u kapën me 24 doza kanabisi, oficeri i kërkoi leje Prokurorisë për të përgjuar dy vëllezërit.
Më tej, efektivi mësohet se ka takuar nënën e tyre dhe i ka treguar për hetimet dhe përgjimet. Ai i ka kërkuar asaj që t’i jepte shuma parash për të mbyllur hetimet. Gruaja më pas ka informuar dy djemtë e saj, moment ky i regjistruar edhe në përgjime.
Në momentin që vëllezërit nuk po paguanin paratë e kërkuara nga oficeri i policisë, Ruçi ka dorëzuar në Prokurori provat dhe përgjimet e dy vëllezërve, pa kuptuar se brenda përgjimeve kishte dhe komunikimin e nënës me dy djemtë e saj.
Prokuroria pasi ka zbardhur bisedat ka kuptuar kërkesën e efektivit për të marrë ryshfet për të mbyllur hetimet.
