DOM GJERGJ META

Ndërkohë që Presidenti rus, Vladimir Putin, citon ungjillin e Gjonit, ai amerikan, Joe Biden, citon Papën Gjon Pali II (përgjysmë).

Të dy pastaj kërcënojnë njëri-tjetrin. Çdo fjalë e tyre kërcënuese është në fakt kërcënim për njerëzimin.

A thua mbaruan argumentet e tani u ka mbetur vetëm Zoti? Kjo luftë nuk ka vetëm një fajtor me siguri, por po me aq siguri kjo luftë dhe të gjitha të tjerat duhet të mbarojnë.

Zoti, ungjilli, Gjon Pali II, profetë e shenjtorë, nuk janë për përdorim sipas interesit të momentit.

Ndryshe kjo quhet ideologji, pragmatizëm, fundamentalizëm. Religjioni, nëse ka një funksion, është ai i afrimit të njeriut me Hyjin dhe mbrojtjes së të shtypurve e të të varfërve. Çdo përdorim tjetër është thjesht i papërshtatshëm e sidomos kur përdoret për të kërcënuar të tjerët.

Kjo është një logjikë që në Evropë e kemi tejkaluar (ashtu mendonim së paku) e nuk mund të kthehemi më mbrapsht.

Njerëzimi i ka të gjitha mundësitë të ringrihet, por kjo nuk mund të ndodhë nëpërmjet luftës dhe armatimeve. Vetëm një shoqëri e paqtë zhvillohet.

Lufta është regres për njerëzimin, pavarësisht se pasuron dikë. Prandaj përpjekjet duhet të jenë për paqen e jo për luftën. Si vis pacem para pacem! Nëse do paqen, përgatit paqen!