Nëse ndiheni të lodhur, pa energji dhe me dëshirë të vazhdueshme për ushqime të ëmbla, shkaku mund të mos jetë vetëm stresi, por edhe nivelet e paqëndrueshme të sheqerit në gjak.
Glukoza, ose sheqeri në gjak, është burimi kryesor i energjisë për trupin. Kur niveli i saj rritet ose bie papritur, organizmi reagon me lodhje, urinë të tepërt, nervozizëm dhe mungesë përqendrimi. Ekspertët thonë se balancimi i glukozës nuk kërkon masa drastike, por disa zakone të thjeshta dhe të përditshme.
1. Kombinoni karbohidratet me proteina
Ushqimet e pasura me karbohidrate si makaronat apo patatet rrisin shpejt sheqerin në gjak dhe po aq shpejt e ulin. Për të shmangur këtë luhatje, rekomandohet të shtoni proteina si vezë, pulë, djathë apo bishtaja, të cilat ndihmojnë në përthithjen më të ngadaltë të sheqerit.
2. Shmangni karbohidratet në formë të lëngshme
Lëngjet, pijet e gazuara dhe madje edhe disa smoothies “të shëndetshme” përmbajnë sheqer të tretur që përthithet menjëherë. Në vend të tyre, është më mirë të konsumoni fruta të plota ose ujë me limon, kastravec apo mente për një hidratim të freskët dhe më të qëndrueshëm.
3. Mos qëndroni pa ngrënë për shumë orë
Kur kalojnë shumë orë pa ushqim, trupi hyn në gjendje stresi dhe mund të fillojë të përdorë masën muskulore për energji. Ekspertët këshillojnë të konsumoni një ushqim të lehtë çdo 3-4 orë, si një frut me pak arra ose kos.
4. Konsumoni diçka brenda orës së parë pas zgjimit
Pas një nate pa ushqim, trupi ka nevojë për energji. Edhe një mëngjes i lehtë si një copë djathë apo pak kos mjafton për të aktivizuar metabolizmin dhe për të ruajtur ekuilibrin e glukozës në gjak.
5. Mos stërvituni me stomak bosh
Ushtrimet pa marrë energji paraprakisht mund të çojnë në djegie të muskujve në vend të yndyrës. Një ushqim i lehtë para aktivitetit fizik, si një fetë bukë me gjalpë arrash, ndihmon për një stërvitje më efektive dhe më të sigurt.
