Kryeministri Edi Rama nëpërmjet disa postimeve në rrjetet sociale u ka bërë thirrje grevisteve të Ballshit që të lenë grevën dhe menjëherë do të nisin bisedimet.
Ai thotë se qeveria nuk është armiku i tyre, por aleati. Rama iu bën thirrje grave që të mos dorëzohen, por as atë mos gënjehen nga “krokodilët që lotojnë për ju” duke nënkuptuar përfaqësuesit e opozitës.
“Të dashura motra greviste të Ballshit! Askush nuk ju kërkon të dorëzoheni, qeveria nuk është armiku po aleati juaj dhe askush nuk ju ofron lëmoshë, ne jemi gati të qajmë hallin tuaj së bashku! E vetmja pengesë mes nesh është greva juaj. Mbyllni grevën dhe unë do jem aty menjëherë! Mos u gënjeni nga krokodilët që lotojnë për ju e duan t’ju përdorin kundër qeverisë! Qeveria është e juaja, por nuk mund të bisedojë me ju nën presion e me ultimatume! Grevat bëhen për t’u dëgjuar, jo për të marrë me zor atë që ke në mendje. Ne ju kemi dëgjuar e po ju presim juve”, shkruan Rama.
Gratë e naftëtarëve janë futur në grevë urie prej dyjavësh. Ato kërkojnë pagat e prapambetura të naftëtarëve dhe rifillimin e punës së rafinerisë së Ballshit.
