Një ngjarje tragjike ka ndodhur sot e shtunë, më 5 shtator, në Greqi, gjatë aktivitetit ajror Athens Flying Week 2026, në bazën ajrore të Tanagrës.
Një avion luftarak Phantom i Forcave Ajrore Greke është rrëzuar gjatë fluturimit demonstrues, duke shkaktuar vdekjen e dy pilotëve që ndodheshin në bord.
Aksidenti ndodhi në mesditë, vetëm pak minuta pasi avioni kishte nisur pjesëmarrjen në shfaqjen ajrore. Sipas pamjeve të publikuara nga vendngjarja, Phantom-i po kryente një manovër në ajër, kur nisi të humbiste ekuilibrin dhe të binte poshtë në tokë. Avioni më pas u përplas me tokën, përpara mijëra spektatorëve, që kishin mbërritur për të ndjekur aktivitetin.
Dy pilotët, të cilët ndodheshin në avion, nuk arritën të mbijetonin nga përplasja. Ngjarja ka shkaktuar tronditje të madhe mes pjesëmarrësve dhe autoriteteve greke, ndërsa në zonë janë angazhuar ekipet përkatëse të emergjencës.
Pas aksidentit tragjik, ministri grek i Mbrojtjes Kombëtare, Nikos Dendias, ndërpreu agjendën e tij në Panairin e 90-të Ndërkombëtar të Selanikut (DETH) dhe u nis drejt Athinës.
Autoritetet greke vendosën gjithashtu të ndërpresin aktivitetet festive të planifikuara pas aksidentit. Ndërkohë, fjalimi i kryeministrit grek Kyriakos Mitsotakis në kuadër të DETH pritet të zhvillohet sipas programit, ndërsa aktivitetet e tjera të planifikuara për më vonë janë anuluar.
Shkaqet e rrëzimit të avionit nuk janë bërë ende të ditura. Autoritetet pritet të nisin një hetim për të përcaktuar rrethanat dhe arsyet që çuan në humbjen e kontrollit të avionit gjatë demonstrimit.
Aksidenti ndodhi në një prej aktiviteteve më të mëdha ajrore në Greqi, ku marrin pjesë avionë ushtarakë dhe civilë dhe ku mijëra njerëz mblidhen çdo vit për të ndjekur demonstrimet në qiell. Tragjedia e Tanagrës ka ndërprerë atmosferën festive të aktivitetit dhe ka kthyer vëmendjen te siguria e fluturimeve demonstrative.
