Në një takim të zhvilluar në Sarandë, Drejtori i Përgjithshëm i Policisë së Shtetit, Skënder Hita, ka folur për forcimin e ligjit dhe luftën ndaj paligjshmërisë, me fokus të veçantë te ndërtimet pa leje dhe korrupsioni brenda strukturave policore.
Ai ka bërë të ditur se disa punonjës policie janë arrestuar për përfshirje në raste që lidhen me lejimin e ndërtimeve pa leje, duke e cilësuar këtë situatë të papranueshme dhe të dëmshme për besimin e qytetarëve ndaj institucionit.
Sipas tij, çdo punonjës policie që shkel ligjin do të përballet me drejtësinë, pavarësisht gradës apo funksionit që mban. Ai ka shtuar se uniforma e policisë nuk mund të përdoret si mbrojtje për paligjshmëri.
Hita ka bërë të ditur gjithashtu se lufta ndaj ndërtimeve pa leje kërkon bashkëpunim mes Policisë së Shtetit, IKMT-së, IMT-së, policisë bashkiake dhe pushtetit vendor, duke theksuar se çdo institucion duhet të reagojë menjëherë kur konstaton shkelje.
Ai ka ngritur shqetësimin se ndërtimet pa leje dëmtojnë zhvillimin urban dhe turizmin, veçanërisht në qytete si Saranda, dhe kërkojnë reagim të shpejtë dhe të koordinuar, sidomos në prag të sezonit turistik.
Në fund të takimit, ai ka ftuar qytetarët të denoncojnë çdo rast paligjshmërie apo abuzimi nga punonjësit e policisë, duke garantuar se strukturat ligjzbatuese do të vijojnë të pastrohen nga çdo individ që cenon ligjin dhe besimin e publikut.
