Dezinformimi mjekësor është një nga rreziqet më serioze që kërcënon sot shëndetin publik, paralajmërojnë mjekë dhe shkencëtarë. Interneti është i mbushur me tituj alarmantë mbi ushqimin, sëmundjet dhe trajtimet – që shpesh nuk kanë bazë shkencore dhe çojnë në vendime të rrezikshme për jetën.
“Këto janë ushqimet më të këqija për lëkurën tuaj”, apo “Nëse e bëni këtë, do të merrni kancer”, janë vetëm disa nga titujt që qarkullojnë masivisht çdo ditë dhe që, sipas ekspertëve, më shumë keqinformojnë sesa ndihmojnë.
Në një apel publik, profesionistët e shëndetit theksojnë rëndësinë e ndjekjes së burimeve të besueshme dhe të konsultimit me mjekët për çdo vendim të rëndësishëm shëndetësor. Ata theksojnë se lajmet e rreme përhapen shumë më shpejt sesa e vërteta, dhe ndikimi i tyre mund të jetë i rrezikshëm.
Si të dalloni faktin nga trillimi?
Ekspertët këshillojnë të kontrolloni burimin e informacionit – faqet me prapashtesat .org, .gov apo .edu zakonisht janë më të besueshme sesa ato komerciale. Po ashtu, rekomandohet të kontrollohet data e publikimit, të lexohet vetë studimi i përmendur dhe mbi të gjitha, të konsultohet një profesionist.
“Interneti mund të jetë një pikënisje e mirë, por vendimet shëndetësore duhen marrë gjithmonë në bashkëbisedim me mjekun”, thuhet në apel. “Sepse kur bëhet fjalë për shëndetin, të gjithë meritojnë të vërtetën.”
