SHBA-të dhe Irani po zhvillojnë një “lojë macesh me miun” në botën e kriptovalutave, ndërsa sanksionet ndërkombëtare kanë shtyrë Teheranin të kërkojë kanale alternative financiare dhe Uashingtonin të mbyllë çdo hapësirë të mundshme për shmangien e tyre, shkruan Al Jazeera.
Sipas raportimeve, ekonomia e kriptovalutave në Iran është kthyer në një sistem paralel financiar që përdoret si nga qytetarët për të ruajtur kursimet, ashtu edhe nga struktura shtetërore dhe të lidhura me to për të anashkaluar kufizimet ekonomike.
Një përdorues kriptovalutash në Teheran, i identifikuar si Firouz, ka treguar se vetëm pak orë para përshkallëzimit të tensioneve ai ka zhvendosur kursimet e tij nga platforma iraniane Nobitex në një portofol privat, nga frika e bllokimit ose humbjes së aksesit në rast lufte apo sulmesh kibernetike.
Ekosistemi i kriptomonedhave në Iran vlerësohet në miliarda dollarë dhe është rritur ndjeshëm vitet e fundit, në një kohë kur inflacioni i lartë dhe zhvlerësimi i monedhës vendase kanë shtyrë shumë iranianë drejt aseteve dixhitale si formë ruajtjeje vlere.
Sipas të dhënave të kompanive të analizës së blockchain-it, një pjesë e konsiderueshme e aktivitetit në këtë sektor lidhet edhe me struktura shtetërore iraniane, përfshirë Korpusin e Gardës Revolucionare Islamike (IRGC), të cilat dyshohet se përdorin kriptovalutat për të gjeneruar të ardhura dhe për të shmangur sanksionet.
Në të njëjtën kohë, SHBA ka intensifikuar presionin ndaj këtij ekosistemi, duke vendosur sanksione ndaj rrjeteve të portofolave dhe platformave të lidhura me Iranin dhe duke ngrirë qindra milionë dollarë në asete dixhitale.
Zyrtarët amerikanë thonë se synimi është ndërprerja e çdo rruge financimi që mund të përdoret nga Teherani për të anashkaluar sistemin ndërkombëtar të sanksioneve, ndërsa autoritetet iraniane vijojnë të zgjerojnë përdorimin e kriptovalutave edhe në tregtinë ndërkombëtare dhe pagesat e energjisë.
Në këtë mënyrë, kriptovalutat janë kthyer në një front të ri përplasjesh mes dy vendeve, ku teknologjia financiare po përdoret njëkohësisht si mjet mbijetese ekonomike dhe si armë gjeopolitike.
