Një ngjarje e pazakontë dhe tronditëse ka ndodhur në Australi, ku një grua solli në jetë një fëmijë që nuk ishte biologjikisht i saj, për shkak të një gabimi të rëndë nga klinika e fertilitetit “Monash IVF”. Klinika ka pranuar se ka implantuar aksidentalisht një embrion që i përkiste një pacienteje tjetër, duke shkaktuar një prej ngatërresave më të rënda në historinë e saj.
“Dua të them sinqerisht më vjen shumë keq për atë që ka ndodhur. Ne jemi të shkatërruar,” deklaroi drejtori ekzekutiv i klinikës, Michael Knaap, në një prononcim publik, ndërsa kërkoi ndjesë për ngjarjen që ka tronditur opinionin publik.
Sipas një zëdhënësi të klinikës, ngatërresa u zbulua në muajin shkurt, kur prindërit biologjikë kërkuan që embrionet e tyre të ngrira të transferoheshin në një klinikë tjetër, por u zbulua se një prej tyre ishte përdorur tashmë. Një embrion i shkrirë gabimisht ishte transferuar tek një paciente tjetër, që nuk kishte asnjë lidhje biologjike me fëmijën që solli në jetë.
Kjo nuk është hera e parë që “Monash IVF” përfshihet në probleme të rënda: vitin e kaluar, klinika pagoi 56 milionë dollarë australianë për shkatërrimin aksidental të qindra embrioneve, të cilat më vonë rezultuan të ishin të zbatueshme për përdorim.
Ngjarja është referuar tashmë organeve rregullatore dhe janë nisur hetimet e brendshme, ndërsa pritet të pasohen edhe nga veprime ligjore dhe kompensime të mundshme për palët e dëmtuara.
