Dy fëmijë të vegjël kanë humbur jetën pas një zjarri të rëndë që përfshiu një banesë në qytetin Wolverhampton, në Britaninë e Madhe, mbrëmjen e së premtes.
Sipas autoriteteve, shërbimet e emergjencës, përfshirë West Midlands Police, shërbimin zjarrfikës dhe atë të ambulancës, u thirrën rreth orës 20:30 në Mason Street, pas raportimeve për një zjarr në një shtëpi banimi.
Zjarrfikësit arritën të hynin në banesë dhe nxorën dy fëmijët, por pavarësisht ndërhyrjes së menjëhershme, ata u shpallën të vdekur në vendngjarje.
Dy fëmijë të tjerë dhe një grua që ndodheshin në banesë kishin arritur të dilnin përpara mbërritjes së shërbimeve të emergjencës dhe, pas kontrollit mjekësor, nuk kanë pasur nevojë për trajtim spitalor.
Autoritetet britanike kanë rrethuar zonën dhe kanë nisur hetimet për të përcaktuar shkaqet e zjarrit, ndërsa banesa raportohet të jetë dëmtuar rëndë.
Në një deklaratë, policia ka shprehur ngushëllimet për familjarët e viktimave, duke e cilësuar ngjarjen si “zemërthyese”.
Hetimet për rrethanat e sakta të ngjarjes vijojnë.
