Ukraina nuk do të jetë në gjendje të largojë Rusinë nga toka e saj. Këtë fakt e ka bërë të ditur këshilltari i ardhshëm i sigurisë kombëtare, Mike Waltz. Në një intervistë për median amerikane ABC News, Waltz tha se lufta duhet të përfundojë diplomatikisht dhe se largimi i Rusisë nga Ukraina është jo realist.
“Të gjithë e dinë se kjo duhet të përfundojë disi diplomatikisht. Unë thjesht nuk mendoj se është realiste të thuhet se do të dëbojmë çdo rus nga çdo pëllëmbë e tokës ukrainase, madje edhe Krimenë. Presidenti Trump e ka pranuar këtë realitet dhe mendoj se ka qenë një hap i madh përpara që e gjithë bota po e pranon atë realitet. Tani le të ecim përpara”, – tha Waltz.
Duke folur në “This Week” të ABC, Waltz tha se Donald Trump ka rënë dakord të takohet me Vladimir Putin por pa dhënë detaje të mëtejshme.
“Nga këndvështrimi i Presidentit Trump, nuk mund të hyni në një marrëveshje nëse nuk keni një lloj marrëdhënieje dhe dialogu me palën tjetër. Dhe ne do ta vërtetojmë absolutisht këtë në muajt e ardhshëm. Ne nuk kemi vendosur ende kornizën e saktë për të. Ne jemi duke punuar për këtë”, – shtoi ai.
Trump tha vazhdimisht gjatë fushatës se ai do të ishte në gjendje t’i jepte fund luftës Rusi-Ukrainë në ditën e tij të parë në detyrë, apo edhe më herët atë. Kohët e fundit, Keith Kellogg, i zgjedhuri i Trump për të qenë një i dërguar special i paqes, vendosi një afat kohor më të gjatë për përfundimin e luftës, e cila sipas tij do të mund të mbyllet në 100 ditët e para të presidencës Trump.
Waltz, anëtar republikan i Kongresit nga Florida, tha se retorika e Trump ka ndihmuar të shpërndahet ideja se lufta ishte një e ardhme e pashpresë që thjesht do të vazhdonte dhe vazhdonte më tej.
