Rusia ka hedhur poshtë kritikat e Japonisë pas vizitës së presidentit rus Vladimir Putin në Ishujt Kuril, duke i cilësuar deklaratat e Tokios si “të pabazuara” dhe duke akuzuar Japoninë për “revizionizëm”.
Zëdhënësja e Ministrisë së Jashtme ruse, Maria Zakharova, tha se Moska i refuzon kategorikisht kritikat japoneze, duke i cilësuar ato “politikisht të parëndësishme, ofenduese dhe, natyrisht, ligjërisht të pabazuara”.
Sipas saj, Ishujt Kuril iu kaluan Rusisë në fund të Luftës së Dytë Botërore, në bazë të marrëveshjeve të arritura me fuqitë aleate dhe Kartës së Kombeve të Bashkuara. Zakharova theksoi se “sovraniteti dhe juridiksioni i Rusisë mbi këto ishuj nuk janë në dyshim”.
Ajo akuzoi gjithashtu Tokion për ndjekjen e një “politike anti-ruse që kufizohet me armiqësinë” dhe kritikoi udhëheqjen japoneze për atë që e cilësoi si përpjekje për t’i diktuar Moskës se cilat territore mund të vizitojë presidenti rus.
“Gati 81 vjet pasi Japonia nënshkroi aktin e dorëzimit pa kushte në shtator 1945, Tokio është përsëri e fiksuar me retorikën revizioniste”, deklaroi Zakharova, duke e akuzuar Japoninë se po përpiqet të minimizojë agresionin e saj në Azi dhe të bëjë pretendime ndaj Rusisë.
Zëdhënësja ruse kritikoi gjithashtu mbështetjen e Japonisë për Ukrainën dhe sanksionet e vendosura ndaj Moskës pas nisjes së ofensivës ushtarake ruse në Ukrainë.
Presidenti rus Vladimir Putin vizitoi të hënën Ishujt Kuril në Lindjen e Largët të Rusisë. Kjo ishte vizita e tij e parë në këtë arkipelag dhe shkaktoi reagim të menjëhershëm nga Tokio, e cila e cilësoi atë “absolutisht të papranueshme”.
Japonia pretendon sovranitetin mbi katër ishuj në pjesën jugore të arkipelagut. Këta ishuj u pushtuan nga ushtria sovjetike në vitin 1945, në ditët e fundit të Luftës së Dytë Botërore dhe mosmarrëveshja territoriale mes Moskës dhe Tokios vazhdon prej dekadash.
